Döş xərçənginin inkişafını izləmək üçün YENİ ÜSUL TAPILDI

Madrid III Karlos Universiteti ( İspaniya ) və Con Hopkins Universitetinin ( ABŞ ) alimləri döş xərçəngi şişlərinin mexaniki və tekstura xüsusiyyətlərinə görə riskini qiymətləndirə bilən yeni hesablama modeli hazırlayıblar.

Publika.az xəbər verir ki, tədqiqat "Acta Biomaterialia" (AB) jurnalında dərc olunub.

Qeyd olunur ki, hesablama modeli onların xassələrini - sərtliyini, sıxlığını və spesifik mikromühitini təhlil etməklə şişin böyüməsi ehtimalını proqnozlaşdırır. Şiş mikromühiti şişi əhatə edən, adətən qeyri-şiş hüceyrələrindən və onların istehsal etdiyi molekullardan ibarət olan fərqli ekosistemdir.

Alimlər izah ediblər ki, şişin böyüməsi prosesi onun adətən fibrilyar matrisdən (məsələn, kollagen) ibarət olan ətraf toxuma vasitəsilə yayılmasını nəzərdə tutur. Şişin ölçüsü şiş hüceyrələrinin ümumi sayı, onların həcmi, sərtliyi və qida maddələrinə çıxış imkanları kimi bir çox amillərdən asılıdır.

Hesablama modelini proqnozlaşdırmaq, məlumatlarla təmin etmək üçün alimlər hüceyrə modelləşdirməsindən istifadə edərək bir sıra əlavə tədqiqatlar aparıblar. Bu, elm adamlarına şiş toxumasının xərçəng hüceyrələrinin yayılmasına (çoxalmasına) və miqrasiyasına necə təsir etdiyini başa düşməyə imkan verib.

Tədqiqatçılar qeyd ediblər ki, onların inkişafı döş xərçənginin hərtərəfli diaqnostikasının bir hissəsi ola bilər və effektiv müalicənin sürətləndirilmiş seçiminə töhfə verə bilər.

Hüseyn İbadlı