Sübut edildi: Qədim Misirdə xərçəng şişləri cərrahi yolla çıxarılıb

Xərçəng, adətən müasir dövrün xəstəliyi kimi qəbul edilir. Ancaq Qədim Misirlə bağlı əldə edilən tibbi mənbələr göstərir ki, o dövrün həkimləri bu xəstəlikdən xəbərdar olublar.

Publika.az xəbər verir ki, 4000 ildən çox yaşı olan bir kəllədən əldə edilən yeni dəlillər, qədim Misir həkimlərinin bəzi xərçəng növlərini cərrahi yolla müalicə etməyə çalışdığını sübut edib.

Kəllə ölüm zamanı 30-35 yaşlarında olan bir kişiyə məxsus olub və Kembric Universitetinin Dakvort laboratoriyasının kolleksiyasında saxlanılır.

19-cu əsrin ortalarından bəri elm adamları kəllənin zədələnmiş səthini, o cümlədən bədxassəli şişlər nəticəsində sümük zədələnməsini təmsil etdiyinə inanılan çoxsaylı lezyonları araşdırıblar.

Arxeoloqlar kolleksiyada 236 nömrə olaraq təyin olunan kəllənin bədxassəli xəstəliklərin ən qədim nümunələrindən biri olduğunu və eramızdan əvvəl 2686-2345-ci illərə aid olduğunu düşünürlər.

Lakin elm adamları bu yaxınlarda rəqəmsal mikroskop və kompüter tomoqrafiyasından istifadə edərək şiş çapıqlarına daha yaxından nəzər saldıqda, şişlərin ətrafında kəsik izlər müşahidə ediblər. Bu da onu göstərir ki, həkimlər şişi çıxarmaq üçün kəskin metal alətlərdən istifadə ediblər.

Alimlər bu haqda “Frontiers in Medicine” jurnalında məlumat veriblər.

Cəmilə