Düşüncənin gücü ilə idarə olunan protez yaradıldı

Massaçusets Texnologiya İnstitutunun tədqiqatçıları amputasiya edilmiş insanlara şüurlu şəkildə hərəkət prosesinə cəmləşmədən təbii və normal sürətlə yeriməyə imkan verən inqilabi protez hazırlayıblar.

Publika.az xəbər verir ki, bionik ayaq istifadəçinin beyin fəaliyyətini deşifrə edir və onu hərəkəti idarə edən mühüm əzələlərdəki sinirlərə bağlayır.

Tədqiqat müəllifi professor Hugh Herrin sözlərinə görə, ilk sınaqların nəticələri təsir edicidir və gələcəkdə protez üzvlərin necə dizayn ediləcəyinə təsir göstərə bilər.

Bununla belə, digər xəstələrin bu cür protezlərdən istifadə etməsinə qədər alimlərin hələ görüləcək çox işi var.

“Nature Medicine” jurnalında dərc edilən araşdırmada qeyd edilib ki, hazırkı protezlərin hərəkət azadlığı və mexanikasında bir çox məhdudiyyətlər var. Alimlər dizdən aşağı ayağını itirmiş insanlara yerişi daha təbii etmək üçün kömək etməyi qarşılarına əsas vəzifə qoyublar.

Yeni texnologiya ilə əvvəlcə ya amputasiya zamanı, ya da daha sonra ayağın kötüyündəki həyati vacib əzələ cütlərini birləşdirən əməliyyat aparılmalıdır.

Bu əzələlərdəki xüsusi sensorlar daha sonra robot nəzarətçiyə siqnallar göndərir ki, bu da ağıllı protezə ayaq biləyini nə qədər əymək və yeriyərkən nə qədər güc tətbiq etmək lazım olduğunu hesablamağa imkan verir.

Əzələ sinirlərindən gələn məlumatlar əvvəlcə protezə, sonra isə canlı üzvün işini xatırladan xəstəyə geri ötürülür. Xəstələr sanki öz xəyali üzvlərini və onun hərəkətini hiss edirlər.

Cəmilə