DƏHŞƏTLİ XƏSTƏLİK - Qadın insanların əvəzinə əjdahaları görür

Niderlandda yaşayan bir qadın onilliklər boyunca insan üzlərini əjdaha sifətləri kimi görməsinə səbəb olan nadir nevroloji pozğunluqdan əziyyət çəkir.

Publika.az xəbər verir ki, bu barədə "Live Science" məlumat yayıb.

52 yaşlı pasiyent uşaqlıqdan bəri halüsinasiyalarla qarşılaşıb - insanların adi üzləri onun üçün qara rəngli, iti qulaqlı, parlaq gözlü və qorxunc cizgilərə malik sürünən başlarına çevrilirmiş.

Bu vəziyyət onun sosial həyatını və normal ünsiyyət qurmaq imkanını ciddi şəkildə pozub.

Beynin kompleks müayinəsindən sonra həkimlər lentikulyar nüvə yaxınlığında zədələnmələr və üz tanıma ilə rəng qavrayışına cavabdeh sahələrdə anormal aktivlik aşkarlayıblar.

Qadına çox nadir bir nevroloji pozğunluq — prozopometamorfopsiya diaqnozu qoyulub. Bu, üzlərin təhrif olunmuş şəkildə qavranılması ilə xarakterizə olunur. Üç illik dərman müalicəsindən sonra qadın halüsinasiyaların demək olar ki, tamamilə yoxa çıxdığını bildirib ki, bu da xəstəliyin müalicəsində mühüm irəliləyiş sayılır.

Bu hadisə tibbi ictimaiyyətin beynin mürəkkəb pozğunluqlarına olan diqqətini artırıb.

Hüseyn İbadlı