İmmuniteti dərmansız belə gücləndirmək olar - SİRR AÇILDI

Almaniya və Braziliyadan olan alimlər belə qənaətə gəliblər ki, müntəzəm fiziki fəaliyyət immun sistemini sözün əsl mənasında “təlimləndirə” bilər.

Publika.az xəbər verir ki, bununla bağlı araşdırma "Scientific Reports" jurnalında dərc olunub.

Orada qeyd edilib ki, onillərdir dözümlülük idman növləri ilə məşğul olan yaşlı insanlarda immun hüceyrələri daha effektiv işləyir, daha uzun müddət aktiv qalır və daha az iltihab yaradır.

Tədqiqatçılar iki könüllü qrupun leykositlərini - yəni ağ qan hüceyrələrini müqayisə ediblər: biri aktiv idmanla məşğul olanlar, digəri isə oturaq həyat tərzi keçirənlər. Məlum olub ki, idmançılarda virusları və xərçəng hüceyrələrini məhv edən “killer” hüceyrələr stressə daha yaxşı uyğunlaşır və enerjidən daha qənaətlə istifadə edir. Hətta immun siqnallarını bloklayan preparatların təsiri altında belə, bu hüceyrələr davamlılığını qoruyur, halbuki məşq etməyən insanlarda tez bir zamanda tükənmə baş verir.

Alimlər qeyd edirlər ki, illərlə davam edən məşqlər immun sistemi “ağıllı” edir: o, hələ də təhlükələrə reaksiya verir, lakin artıq həddindən artıq iltihab reaksiyalarından qaçır.

Müəlliflərin fikrincə, bu balans sağlam qocalmanın və xroniki xəstəliklərin qarşısının alınmasının açarı ola bilər.

Hüseyn İbadlı