Bu qadınlar qəfil ürək ölümü riskinə məruz qalırlar

Peşəkar bodibildinqlə məşğul olan qadınlar qəfil ürək ölümü riskinə anormal dərəcədə yüksək səviyyədə məruz qalırlar.

Publika.az xəbər verir ki, bu nəticəyə Padua Universitetinin alimləri gəliblər.

Alimlər 2005–2020-ci illər arasında beynəlxalq bodibildinq yarışlarında iştirak etmiş təxminən 9,5 min qadının tibbi məlumatlarını təhlil ediblər. Nəticədə 32 ölüm hadisəsi qeydə alınıb. Onların təxminən üçdə biri qəfil ürək dayanması ilə bağlı olub.

Bu əlaqə xüsusilə peşəkar bodibildinqçilər arasında daha aydın şəkildə müşahidə olunub: onlarda ürək ölümü riski həvəskar idmançılara nisbətən 20 dəfə çox olub.

Tədqiqatın aparıcı müəllifi doktor Marko Vekkato bildirib ki, ekstremal fiziki yüklənmələr, xroniki susuzluq, sərt pəhrizlər və stimullaşdırıcı maddələrin qəbulu ürək-damar sisteminə ciddi yük yaradır.

Alimlər idmançı qadınların psixoloji vəziyyətindən də narahatlıqlarını ifadə ediblər. Tədqiqat göstərib ki, qadın bodibildinqçilər arasında ölüm hallarının 13%-i intihar və ya zorakı səbəblərlə bağlıdır. Bu göstərici bu idman növündə kişilərlə müqayisədə dörd dəfə yüksəkdir.

Müəlliflər vurğulayıblar ki, ideal bədən quruluşuna can atmaq sağlamlıq üçün ciddi nəticələr doğura bilər. Onlar bodibildinqçilər üzərində tibbi nəzarətin gücləndirilməsini, eləcə də müntəzəm kardioloji müayinələrin müşahidə proqramlarına daxil edilməsini tövsiyə edirlər. Hətta gənc və zahirən sağlam idmançılar üçün belə.

Bundan əlavə, mütəxəssislər yüksək səviyyəli idmançılara təsir edən psixososial amillərə daha çox diqqət yetirilməsini tövsiyə edirlər.

Hüseyn İbadlı