Səhiyyə

500 mindən çox ev quşu məhv edilmişdi, indi də yüzlərlə dəvəquşunu öldürdülər

8 Noyabr 2025 09:44

Kanadanın Britaniya Kolumbiyası bölgəsində "quş qripi"nin yayılma təhlükəsi səbəbindən fermada saxlanılan 300-dən çox dəvəquşu öldürülüb.

Publika.az "New York Post" nəşrinə istinadən xəbər verir ki, quşların kütləvi şəkildə məhv edilməsinə Kanada Ali Məhkəməsi qərar verib. Yerli fermerlər isə təhlükəli virus epidemiyası ilə bağlı atılan sərt addımların davamını əngəlləməyə çalışırlar.

Kanada Qida Müfəttişliyi Agentliyi xəstəliyin daha da yayılmasının qarşısını almaq məqsədi üçün belə addım atıldığını bəyan edib. Kəskin qərar verilməsinə ötən qışda 69 dəvəquşunun "quş qripi"nə yoluxaraq ölməsinin səbəb olduğu bildirilir. Təsərrüfat nümayəndələri isə qalan quşların tamamilə sağlam olduğunu və heç bir təhlükə yaratmadığını iddia edirlər.

Bundan əvvəl Almaniyada "quş qripi" virusunun yayılma riski yüksək olduğu üçün 30 fermada 500 mindən çox toyuq, ördək, qaz və hind quşu məhv edilib.