Xroniki yorğunluğun GİZLİ SƏBƏBİ - “İzahsız” xəstəlik əslində bu imiş...

Mount Sinai Tibb Məktəbindən alimlər xroniki yorğunluq sindromunun əsasını təşkil edə biləcək gözlənilməz bir mexanizmi aşkar ediblər.

Publika.az xəbər verir ki, araşdırma "Frontiers in Medicine" jurnalında dərc olunub.

Araşdırma xəstələrin əksəriyyətində bu vəziyyətin yalnız aşağı məşq tolerantlığı ilə deyil, həm də gündəlik müayinələrlə aşkar edilməyən gizli tənəffüs problemləri ilə əlaqəli olduğunu göstərib.

Tədqiqatçılar iki günlük kardiorespirator test proqramı zamanı xroniki yorğunluq sindromu olan 57 xəstə və 25 sağlam könüllü üzərində araşdırma aparıblar. Məlum olub ki, xəstələrin 42 faizi disfunksional tənəffüs əlamətləri, 32 faizi isə xroniki hiperventilyasiya nümayiş etdirir. Bu zaman insan çox səthi və sürətli nəfəs alır, qanı kifayət qədər karbon qazı ilə doyurmur. Çox vaxt hər iki pozuntu eyni anda müşahidə olunub. Belə bir birləşmə sağlam iştirakçılarda qeydə alınmayıb.

Bu tənəffüs pozuntuları başgicəllənmə, ürəkdöyünmənin sürətlənməsi, təngnəfəslik və artan yorğunluğa səbəb olur. Bunlar bir çox pasiyentlərin “izahsız” xəstəlik kimi qəbul etdikləri simptomlardır. Alimlər güman edirlər ki, bu pozuntular vegetativ sinir sisteminin disfunksiyası nəticəsində yaranır və hər hansı gərginlikdən sonra sindroma xas olan tükənməni gücləndirir.

Müəlliflərin fikrincə, tənəffüsün korreksiyası xroniki yorğunluq sindromunun müalicəsində yeni istiqamət ola bilər. Nəfəs məşqləri, yoqa, yavaş üzgüçülük və mülayim fiziki fəaliyyət — bunlar nəfəs ritmini sabitləşdirən və qandakı karbon qazının miqdarını normallaşdıran üsullardır.

Hüseyn İbadlı