Avropanı cənginə alan təhlükəli “SUPERGÖBƏLƏK” - Qırmızı, qaşınan səpgilər yaranır

Avropa ölkələrində müalicəyə yüksək davamlılığı ilə seçilən "Trichophyton indotineae" göbələyinə yoluxma halları sürətlə artır.

Publika.az xəbər verir ki, bu barədə "The Sun" məlumat yayıb.

Qeyd edilib ki, bu səbəbdən mütəxəssislər onu artıq “supergöbələk” adlandırırlar.

Mançester Universitetinin yoluxucu xəstəliklər üzrə eksperti Devid Denningin sözlərinə görə, infeksiya qırmızı, qaşınan səpgilərlə özünü göstərir və ən çox qasıq nahiyəsində, budlarda və ombada yaranır.

Nəşr qeyd edir ki, son üç ildə Böyük Britaniyada yoluxma halları təxminən 500% artıb. İnfeksiya həm yoluxmuş insanla təmas zamanı, həm də çirklənmiş əşyalar və səthlər vasitəsilə ötürülür. Yaxın bədən təmasında da yoluxma mümkündür. Xəstəlik həyati təhlükə yaratmasa da, göbələyin davamlılığı səbəbindən müalicə həftələrlə, hətta aylarla uzana bilər.

Denning vurğulayır ki, vəziyyət qlobal miqyasda ciddi problemə çevrilə bilər.

The Sun-un məlumatına görə, son on ildə bu infeksiya Almaniya və ABŞ da daxil olmaqla 20-dən çox ölkədə aşkarlanıb.

Hüseyn İbadlı