Soyuducu qapısında saxlanılan dərmanlar öldürə bilər - Xəbərdarlıq

Soyuducunun ev aptek qutusu üçün universal və ən təhlükəsiz yer olması barədə yayılmış fikir ciddi bir yanlışlıqdır.

Publika.az xəbər verir ki, bu barədə "Qazeta.Ru"ya kimya elmləri namizədi, RTU MIREA-nın Biotexnologiya və Sənaye Əczaçılıq kafedrasının dosenti Aleksey Panov məlumat verib.

"Bir çox dərman vasitələri üçün soyutma, xüsusən də dondurma yalnız onların saxlanma müddətini yaxşılaşdırmır, həm də birbaşa terapevtik xüsusiyyətlərinin itirilməsinə və hətta sağlamlıq üçün təhlükəli olan parçalanma məhsullarının yaranmasına səbəb olur. Hər bir konkret preparatın saxlanma şəraiti istehsalçı tərəfindən müəyyən edilir və istifadə təlimatında göstərilir", - deyə o izah edib.

O qeyd edib ki, soyuducunun əsas təhlükəsi, potensial dondurma ehtimalından başqa, aşağı temperatur və yüksək nəmliyin birləşməsidir:

"Həblər, tozlar, kapsullar və bəzi məlhəmlər kimi bir sıra dərman formaları rütubətə qarşı olduqca həssasdır. Uyğun olmayan şəraitdə, məsələn, soyuducunun ümumi bölməsində hermetik qab olmadan saxlanıldıqda, onlar rütubətlənə bilər. Bu isə fiziki-kimyəvi xüsusiyyətlərin dəyişməsinə, təsiredici maddələrin vaxtından əvvəl məhv olmasına və mikroorqanizmlərin artması riskinə səbəb olur. Bu, xüsusilə bitki mənşəli preparatlara və təbii komponentlər əsasında hazırlanan vasitələrə aiddir".

Onun sözlərinə görə, bəzi dərman vasitələrini heç bir halda dondurmaq olmaz:

"Bunlara əksər vaksinlər, insulinlər, bəzi interferon növləri və digər zülal mənşəli preparatlar aiddir. Onların tərkibindəki aktiv maddələr, məsələn, zülallar və ya lipidlər mənfi temperaturda denaturasiya prosesinə məruz qalır. Bu, molekulun strukturunun geridönməz şəkildə dəyişməsidir ki, bu da preparatı tamamilə faydasız edir, vaksinlər halında isə onu immunogen xüsusiyyətlərindən məhrum edir. Dondurma həmçinin emulsiyaların geridönməz şəkildə qatlara ayrılmasına və ya ampulaların zədələnməsinə səbəb ola bilər. Donmuş preparat dondan açıldıqdan sonra zahirən normal görünsə də, onun terapevtik aktivliyi itmiş ola bilər və belə bir vasitənin istifadəsi mənasız və təhlükəli olur".

Həmçinin, əgər təlimatda birbaşa qeyd olunmayıbsa, sirop və su əsaslı suspenziya formasında olan preparatları soyuducuda saxlamaq olmaz.

"Aşağı temperatur çox vaxt şəkərlərin və digər komponentlərin kristallaşmasına və çöküntü verməsinə səbəb olur ki, bu da dəqiq dozalamağı qeyri-mümkün edir. Maye ekstraktlar və tinkturalar (dəmləmələr) bulana bilər və xüsusiyyətlərini dəyişə bilər. Bundan əlavə, dərman vasitələrini su buxarlandıran və kəskin qoxu yayan qida məhsullarının (tərəvəz, meyvə, balıq) yanında saxlamaq olmaz, çünki bu, preparatların keyfiyyətinə mənfi təsir göstərir.

Əəgər preparatın istifadə təlimatında soyuducuda saxlanma qeyd olunubsa, həmin preparat ayrı, hermetik bir qabda, dondurucu kameradan və temperaturun daha çox dəyişdiyi qapı hissəsindən uzaqda - soyuducunun orta rəfində yerləşdirilməlidir", - deyə kimyaçı xəbərdarlıq edib.

Hüseyn İbadlı