Qocalığın zəifliyini aradan qaldırmağın üsulu tapıldı

Florida Atlantik Universitetinin rəhbərliyi altında ABŞ-dan olan tədqiqatçılar bu qənaətə gəliblər ki, kök hüceyrə inyeksiyası yaşlılıq zəifliyi olan yaşlı insanların fiziki vəziyyətini nəzərəçarpacaq dərəcədə yaxşılaşdıra bilər.

Piublik.az xəbər verir ki, klinik sınağın nəticələri "Cell Stem Cell" jurnalında dərc olunub.

Tədqiqatda "qocalıq kövrəkliyi" (frailty) adlanan vəziyyətdən əziyyət çəkən 70-85 yaş arası 148 nəfər iştirak edib. Bu vəziyyət zamanı əzələ gücü və dözümlülük azalır, həmçinin yıxılma, əlillik və xəstəxanaya yerləşdirilmə riski artır. İştirakçılara "laromestrocel" preparatı - gənc donorların sümük iliyinin kök hüceyrələri əsasında hazırlanan terapiya yeridilib.

İnyeksiyadan doqquz ay sonra pasiyentlərin təxminən üçdə biri vəziyyətlərində nəzərəçarpacaq yaxşılaşma nümayiş etdirib və artıq qocalıq kövrəkliyi meyarlarına uyğun gəlməyiblər. Bundan əlavə, terapiyanı daha yüksək dozada alan iştirakçılar yerimə sürəti testində daha yaxşı nəticələr göstəriblər: onlar orta hesabla altı dəqiqə ərzində plasebo qrupundakı sınaq iştirakçılarından 63 metr daha çox yol qət ediblər.

Alimlərin sözlərinə görə, müalicə yaşla bağlı tədricən azalan kök hüceyrə ehtiyatının bərpasına yönəlib. Bu, xroniki iltihabı azaltmağa, damarların işini yaxşılaşdırmağa və toxumaların bərpasını stimullaşdırmağa kömək edə bilər.

Tədqiqatçılar hesab edirlər ki, bu cür metodlar orqanizmin yaşla bağlı zəifləməsi ilə mübarizədə yeni yanaşma ola bilər. Lakin terapiyanın effektivliyini və təhlükəsizliyini təsdiqləmək üçün daha genişmiqyaslı klinik sınaqlara ehtiyac duyulacaq.

Hüseyn İbadlı