Bu məhsul mədəaltı vəzi xərçəngi riskini artırır

Qırmızı ət istehlakı mədəaltı vəzi xərçəngi riski artıra bilər. Çinli alimlər təxminən 2 milyon insanın iştirak etdiyi 16 tədqiqatın nəticələrini təhlil edərək belə bir qənaətə gəliblər.

Publika.az xəbər verir ki, tədqiqatın nəticələri "Frontiers in Nutrition" jurnalında dərc olunub.

Tədqiqatçılar 1,96 milyon iştirakçının məlumatlarını araşdırıblar və onlardan 8856 nəfərdə mədəaltı vəzi xərçəngi qeydə alınıb. Məlum olub ki, qırmızı əti ən çox istehlak edən insanlarda bu xəstəliyə tutulma riski, onu daha az yeyənlərlə müqayisədə 16 faiz yüksək olub.

Bundan əlavə, alimlər xətti asılılıq aşkar ediblər: gündəlik qəbul edilən hər əlavə 100 qram qırmızı ət mədəaltı vəzi xərçəngi riskinin təxminən 10 faiz artması ilə bağlı olub. Qırmızı ətə mal əti, donuz əti, qoyun əti və digər məməli heyvanların əti daxildir.

Bununla belə, emal edilmiş ət məhsulları – kolbasa, sosiska, bekon və digər oxşar qidalar ilə mədəaltı vəzi xərçəngi riski arasında statistik baxımdan əhəmiyyətli bir əlaqə aşkar edilməyib. Müəlliflər qeyd edirlər ki, bu mövzuda əvvəlki tədqiqatların nəticələri ziddiyyətli olduğu üçün genişmiqyaslı bir meta-analiz aparılıb.

Alimlər vurğulayırlar ki, bu iş yalnız əlaqəni göstərir, birbaşa səbəb-nəticə əlaqəsini deyil. Buna baxmayaraq, əldə edilən məlumatlar onu göstərir ki, qırmızı ət istehlakını məhdudlaşdırmaq ən təhlükəli onkoloji xəstəlik növlərindən birinin riskini azaltmağın yollarından biri ola bilər.