Türk dünyasının mədəni irsi ilə bağlı əməkdaşlıq imkanları müzakirə edilib

11 iyun 2026-cı il tarixində Türk Mədəniyyəti və İrsi Fondunun prezidenti professor Aktotı Raimkulova Azərbaycan Respublikası Xarici İşlər Nazirliyinin Şərqi Avropa, Cənubi Qafqaz, Qərbi və Mərkəzi Asiya İdarəsinin rəisi Gürsel İsmayılzadə ilə görüşüb.

Publika.az xəbər verir ki, görüşdə Fond tərəfindən həyata keçirilən beynəlxalq layihələr, türk xalqlarının zəngin mədəni irsinin qorunması, təbliği və gələcək nəsillərə ötürülməsi istiqamətində görülən işlər, eləcə də təşkilatın yaxın dövr üçün müəyyən etdiyi prioritet fəaliyyət istiqamətləri müzakirə olunub.

Professor Aktotı Raimkulova Fondun üzv və müşahidəçi ölkələrdə, həmçinin digər dövlətlərdə qədim türk tarixi-mədəni irsinin qorunmasına yönəlmiş təşəbbüsləri, beynəlxalq təşkilatlarla əməkdaşlıq əlaqələri və həyata keçirilən layihələri barədə ətraflı məlumat verib.

Gürsel İsmayılzadə isə Fondun fəaliyyətini yüksək qiymətləndirərək, təşkilatın türk dövlətləri arasında mədəni-humanitar əməkdaşlığın inkişafına, həmçinin türk dünyasının beynəlxalq platformalarda daha geniş tanıdılmasına verdiyi töhfələri xüsusi vurğulayıb.