Marketlərdə əcnəbi musiqi...?

Bakıda son illərdə nəhəng ticarət mərkəzləri fəaliyyətə başlayıb. İlk növbədə onu qeyd edim ki, bu obyektlərdə yüksək ticarət mədəniyyəti var.

Məni (eləcə də alış-verişə gələn alıcıları) bir məsələ rahatsız edir. Bu marketlərdə, o cümlədən 9-a mikrorayonun Mir Cəlal küçəsində yerləşən “Favorit” və “Safastore” ticarət mərkəzlərində fasləsiz olaraq əsasən xarici musiqilər verilir. Bu musiqilərin hədsiz səslə bütün salonda səsləndirilməsi əsəbləri qıcıqlandırır. Bura gələnin xəstəsi, qocası, əliuşaqlısı... var. Hətta bəzən musiqi o dərəcədə gur səsləndirilir ki, satıcıdan nəyisə soruşmaq üçün qışqırmalı olursan.

Digər tərəfdən, musiqinin yadlığı alıcıların əksəriyyətinin əsəblərini gərginləşdirir, hətta alış-verişə mane olur. Belə marketlərin adlarının əcnəbi tör-töküntüsü olması bir yana, axı alıcını nə üçün məcbur edirlər ki, yad musiqiyə qulaq assın?

Bu məsələ ilə bağlı təkcə market sahibləri deyil, əlaqədar rəsmi qurumlar da ciddi tədbirlər görməlidirlər.

İlham Rəhimli,

teatrşünas-tənqidçisi, jurnalist,

əməkdar incəsənət xadimi,

sənətşünaslıq doktoru, professor