"Mətbuatın 90 faizi əleyhimədir"

Azərbaycan Yazıçılar Birliyinin sədri Anar 1937.az-a açıqlamasında mətbuata danışmayacağı ilə bağlı səsləndirdiyi fikirlərə aydınlıq gətirib:

“Mətbuatın 90 faizi mənim əleyhimədir. Bir neçə qəzeti çıxmaq şərti ilə qalanları dediyim sözləri təhrif etməklə məşğuldur. Haqqımda şər-böhtan xarakterli yazılar yazırlar. Buna görə də bir müddət heç bir mətbu orqana açıqlama, müsahibə verməyəcəyəm. Bunun üçün Yazıçılar Birliyinin mətbuat xidməti var”.

***

Yazıçılar Birliyinin sədri Anar qurumun rəsmi saytında bəyanat yayıb. O, bir daha mətbuata danışmayacağını deyib.

Xalq yazıçısı bildirib ki, yalnız özünün dediyi sözlərə cavabdehdir, onun adından deyilənlərə yox.

Dediklərinin qərəzli şəkildə təhrif edildiyinə və ucuz sensasiya xətrinə sözlərini konteksdən çıxarıb, öz məqsədlərinə uyğun təqdim etdiklərinə görə müəyyən mətbuat orqanlarına və bəzi saytlara müsahibə verməyəcəyini bildirən Xalq yazıçısı, “özlərinə zəhmət verib təxribatçı suallarla mənə müraciət etməsinlər, cavab almayacaqlar” - deyib.