• USD 1,7339 0,00% EUR 1,8516 0,00%
    • GBP 2,1859 0,00% RUB 0,0272 0,00%

Dünya çempionu Bakı 2015-in elçisi seçildi

Dünya çempionu Bakı 2015-in elçisi seçildi

“Bakı 2015” polşalı dağ velosipedi idmançısı Maya Vloşçovskanın bu yayın ən mötəbər tədbirinin idman elçisi olacağını açıqlayıb.

Publika.az xəbər verir ki, Maya Vloşçovska Pekin-2008 Yay Olimpiya Oyunlarında dağ velosipedi idmanının kros-kantri proqramı üzrə qadınlar arasında keçirilmiş yarışın gümüş medalını, 2010-cu ildə isə eyni idman növü üzrə dünya çempionu adını qazanıb.

İlk əhəmiyyətli qələbəsini 2003-cü ildə dağ velosipedi üzrə marafon yürüşündə dünya zirvəsinə yüksəlməklə əldə edən təcrübəli idmançı bu günə qədər dünya və Avropa çempionatlarının 22 medalını qazanıb.

“Bakı 2015”-in əməliyyatlar üzrə baş direktoru Saymon Kleq açıqlamasında bildirib ki, Mayanın beynəlxalq idman elçisi kimi Oyunlara cəlb edilməsi ilk Avropa Oyunlarının əhəmiyyətinə daha bir bariz nümunə və bu yay Bakıya gələcək idmançıların səviyyəsinin əyani göstəricisidir: “Karyerası boyunca Mayanın əldə etdiyi uğurlar onun dağ velosipedi idmanına bağlılığını nümayiş etdirir və iyun ayında Avropa Oyunlarında onun yarışlarda iştirakını səbirsizliklə gözləyirik”.

“Bakı 2015”-in idman elçiləri mübarizə apardıqları idman növünü təmsil etməklə qitədə və sosial mediada həyata keçirilən marketinq kampaniyalarında Avropa Oyunlarının təbliğatında iştirak edəcəklər.

31 yaşlı Maya Vloşçovska deyib: “Avropa Oyunlarının idman elçisi seçilməyim məni çox həyəcanlandırır və bu yay Bakıda mübarizə aparacağım günü səbirsiziklə gözləyirəm. Oyunların və dağ velosiped idmanının Avropada, eləcə də, bütün dünyada nüfuzunu artırmaq üçün əlimdən gələni etməyə hazıram”.

Polşa Milli Olimpiya Komitəsinin prezidenti Andrjey Krasniçki deyib: “Maya “Bakı 2015”-in elçi proqramı üçün əla seçimdir və onun Oyunları Polşada təbliğ etmək və bu yay idmançılarımıza dəstək olmaq üçün səylərini əsirgəməyəcəyinə əminəm”.

Maya Vloşçovska almaniyalı stolüstü tennisçi Dimitri Ovçarov, yunan qılıncoynadan Vasiliki Vuqiuka, irlandiyalı boksçu Keti Teylor, britaniyalı taekvondoçu Ceyd Cons, fransalı bədii gimnast Kseniya Mustafayeva, danimarkalı avarçəkən Rene Holten Poulsen və Duşan Domoviç Bulut, Marko Saviç, Marko Zdero və Deyan Maystoroviçdən ibarət Serbiya 3x3 basketbol komandasından sonra “Bakı 2015”-in növbəti beynəlxalq idman elçisi oldu. Yaxın gələcəkdə daha bir neçə idmançı da bu proqrama cəlb oluna bilər.

Bakı 2015-in dağ velosipedi üzrə yarışları iyunun 13-də, Dağ Velosipedi Parkında baş tutacaq.

Publika.az

Xəbər lenti

DAHA ÇOX XƏBƏR