Dünya

Kürdcəni yasaqlayan İŞİD çox sayda kürdü öldürdü

8 Sentyabr 2014 08:39

ABŞ və kürd silahlıların hücumları ilə Mosula doğru geri çəkilən İŞİD terror qruplaşması agent olmaqda ittiham etdiyi kürd üzvlərini güllələməyə başlayıb.

ANS PRESS-in xəbərinə görə, bu barədə məlumatı Kürdüstan administrasiyası Dini İşlər nazirliyinin sözçüsü Merivan Nəqşibəndi yayıb. Nəqşibəndi, 2014-cü ilin ilk 8 ayında 100-ə yaxın kürdün İŞİD-ə qoşulduğunu, bu barədə heç bir araşdırma aparılmadığını və rəsmi açıqlama olmadığını deyib.

“Basnews” xəbər mərkəzinə məlumat verən Nəqşibəndi İŞİD-in xüsusilə Kürdüstan bölgəsindən həyata keçirilən hücumlardan sonra öz arasında olan kürdlərə şübhə ilə yanaşdığını, keçən həftə 13, bu həftə 18 kürdü güllələdiyini bildirib.

İŞİD-in kürdləri öldürməyə davam etdiyini deyən Nəqşibəndi terror təşkilatının kürdlərə birlikdə gəzməyi və öz aralarında kürdcə danışmağı yasaqladığını bildirib.