Azərbaycan çempionunda baş məşqçi dəyişikliyi

"Rabitə" voleybol klubunun baş məşqçisi dəyişdirilib.

Publika.az xəbər verir ki, Azərbaycan çempionuna rəhbərlik edən Deyan Brdjoviç istefaya göndərilib.

Tərəflər arasında müqaviləyə qarşılıqlı razılıq əsasında xitam verilib. Buna komandanın uğursuz çıxışı səbəb olub.

Belə ki, "Rabitə" Çempionlar Liqasında çıxış etdiyi bütün illərdə mərhələ adlasa da, bu dəfə 6 oyundan 4-də uduzmaqla, CEV Kubokuna enib.

Həmçinin, “Rabitə” Azərbaycan Super Liqasında XII turdan sonra lider olsa da, passivində 2 məğlubiyyət var.

“Rabitə”nin yeni baş məşqçisi Zoran Qayiç təyin olunub. 57 yaşlı Olimpiya çempionu ikinci dəfə Bakı təmsilçisinin “sükanı arxası”na keçməyindən məmnunluq hissi duyduğunu deyib. O, son illərin dəyişməz Azərbaycan çempionunun iştirak etdiyi yarışlarda yüksək pillələrdəki yerini qorumağa çalışacağını bildirib:

“Artıq komanda ilə danışıqlarım yekunlaşıb. Mən “Rabitə”yə kömək etmək üçün gəlmişəm. Komandanın prezidenti Cəlil Cəfərovla bu barədə söhbətimiz olub. Əsas məqsədimiz iştirak edəcəyimiz yarışlarda özümüzü yaxşı tərəfdən göstərməkdir”.

Publika.az