Suriya Türkman Məclisinin sədri: “Türkmanlar Liviyaya qaçmaq istəyirlər” – ÖZƏL

“Rusiya hava hücumlarında Suriya türkmanları hədəfə alıb”.

Bu barədə Publika.az-a açıqlamasında Suriya Türkman Məclisinin lideri Əbdürrəhman Mustafa deyib.

Onun sözlərinə görə, hazırda bölgədəki vəziyyət yaxşı deyil: “Rusiya İŞİD-ə qarşı əməliyyat keçirdiyini deyir, lakin onun hədəf aldığı bölgələr minlərlə türkmanın yaşadığı və Türkiyənin dəstəklədiyi Azad Suriya Ordusunun idarəçiliyində olan ərazilərdir. Hücumlarda Türkmandağına sığınan Bayırbucak türkmanları və 9 mindən çox türkmanın yaşadığı Hamanın cənubu, Humusun şimalında yerləşən Telbise, Kanto və Zəfarə vilayətləri hədəf oldu. Bu bölgələrdə İŞİD zülmündən qaçan türkmanlar yerləşib. Hücumlardan sonra çoxlu sayda sivil vətəndaşın həyatını itirdiyi xəbərləri gəlir”.

Ə. Mustafa Rusiya qırıcılarının hücumunda sonra türkmanların bölgəni tərk etmək istədiklərini, Liviyaya getmək qərarına gəldiklərini deyib. Bildirib ki, türkmanların xilası üçün nəsə edilməlidir: “Rusiyanın hava hücumlarından ciddi şəkildə narahat oluruq. İndiyə qədər türkmanlar bir neçə dəfə hədəfə alınıb. Gah PYD (PKK-nın Suriya qolu - red), gah İŞİD tərəfindən hücuma məruz qalıblar. İndi isə türkmanları hədəfə alan Rusiyadır”.

Suriya türkmanlarının lideri bölgədə çox qarışıq vəziyyətin olduğunu, türkmanların yaşamaq üçün mübarizə apardıqlarını bildirib. Qeyd edib ki, İŞİD zülmü nəticəsində öz doğma yurdlarını tərk edən türkmanları indi də Rusiya didərgin salır.

Asif Nərimanlı