Ordumuzun zərbəsi İrəvanı YERİNDƏN OYNATDI: Sarkisyanın Ermənistanı yox olmaq üzrə

Ermənistanın təxribat hücumu zamanı Azərbaycan bir şəhid verdi, ardınca ordumuzun cavab atəşi nəticəsində düşmən ordusunun 6 əsgəri məhv edildi. Azərbaycanın bu cavabı isə Ermənistanın siyasi gündəmini əməlli-başlı dəyişdi.

Publika.az xəbər verir ki, artıq İrəvanın işğalçı rejiminə qarşı etiraz səsləri eşidilir.

Ermənistanda ərazilərin qaytarılması tələbi

“1in.am” saytı yazır ki, erməni əsgərlərin məhv olmasının qarşısını almaq üçün artıq bu məsələyə - münaqişəyə son qoymaq lazımdır: “Lakin bunu necə etməliyik?! Ermənistanda ərazilərin qaytarılmasını tələb edənlər var. Erməni milli konqresi bunu açıq şəkildə bəyan edib də. Hakimiyyət buna qarşı çıxır, lakin ərazilərin qaytarılmasını nəzərdə tutan “Madrid prinsipləri”ndən də de-yure olaraq imtina etmir. Bütün modellər sülh əvəzinə ərazilərin qaytarılmasını özündə əks etdirir”.

İrəvanda Qarabağ aksiyasının anonsu

Erməni saytı qeyd edir ki, münaqişə nə qədər davam edir, cəbhədə gərginlik də sona çatmayacaq.

“Erməni əsgərlərin itkisi də dayanmayacaq və ən yaxın bir neçə ildə ümumilikdə erməni dövlət quruluşu üçün ciddi təhlükəyə çevriləcək. Çünki “elita” (Ermənistan rəhbərliyi - red.) iki onillik boyunca manipulyasiya ilə məşğul olaraq, erməniləri aldadır. İndi cəmiyyət qarşıya tələb qoymalıdır, hakimiyyəti nəsə etməyə məcbur etməlidir. əgər heç nə edilmirsə, o zaman dəyişikliyin vaxtı çatıb”, - deyə məqalədə sadə ermənilərə keçəyə çıxıb hakimiyyətə qarşı etirazlara qalxmaq çağırışı edilir.

Erməni hökmdarlarının oğulları niyə səngərə gəlmir?

Eyni çağrışla “armenianreport” saytı da çıxış edir. Sayt yazır ki, erməni ordusu ciddi itki verdi: “İndi hakimiyyət bunu qəhrəmanlıq, kişilik adlandırır. Halbuki, bu ikiüzlülükdür. Biz öz övladlarımızı itirdik, onların valideynləri oğullarının ölərək, “qəhrəman” olmasını istəmir, yaşamasını istəyirlər. Axı hakimiyyətin “kişilik” adlandırdığı hərəkəti niyə iqtidar nümayəndələrinin övladları etmir? Nə üçün Ermənistan hökmdarlarının uşaqları səngərlərdə yoxdur?!”.

Ermənistan itkilərin sayını gizlədir

Sayt əlavə edir ki, erməni hakimiyyəti vətənpərvərlikdən südverən inək kimi istifadə edərək, varlanır.

“Ermənistanın “cəsur” Xarici İşlər Nazirliyi Bakını ittiham edir. Halbuki, artıq Bakıda bu cür sözlərə əhəmiyyət belə vermirlər. Çünki Ermənistan heç nə edə bilmir, sadəcə bacarmır. Hakimiyyət əhalini aldadır, bundan sonra da aldadacaq. Necə ki, “aprel müharibəsi”nə qədər aldadırdılar ki, “biz istənilən ölçüdə cavab vermək iqtidarındayıq”, halbuki, heç nə edə bilmədik, indi də eyni yalanları dövriyyəyə buraxıblar. Yenə də yalan danışmaqda davam edirlər və itkilərin gerçək sayını gizlədirlər”, - deyə məqalədə bildirilir.

Asif