• USD 1,7430 +0,35% EUR 1,8487 -1,24%
    • GBP 2,1929 -0,21% RUB 0,0275 +0,36%

Lazer epilyasiyasının zərərləri haqqında - FOTOLAR

  • Qadın
  • 24 May 2014 14:19
  • 27 831 Baxış
Lazer epilyasiyasının zərərləri haqqında - FOTOLAR

Yayın gəlişi ilə qadınların qarderobu tamamilə dəyişib, nazik və çiçəkli donlarla əvəz olunsa da,isti hava özü ilə bəzi xoşagəlməz hallar gətirir. Xanımların yay sarafanlarında nə qədər gözəl görünmələrinə baxmayraq, zəhlətökən tüklər şən yay əhvalına soğan doğrayır. Onları hər dəfə təmizləmək isə sözün əsl mənasında əsəbiləri korlayır və vaxt aparır. Geniş yayılmış lazer epilyasiyası artıq bu problemi birdəfəlik həll etməyə qadirdir. Bəs, lazer epilyasiyası nədir? Ondan istifadə nə dərəcədə effektivlidir və zərərsizdir?

Publika.Az-ın “Kokteyl” layihəsi çərçivəsində bu həftə həkim-kosmetoloq Zümrüd Hacıyeva lazer epilyasiyası haqqında suallarımıza cavab verdi. Zümrüd xanım epilyasiyanın növləri, fəsadları, menstruasiya və hamiləlik dövründə nə kimi fəsadlar yarada biləcəyi haqqında danışdı.

- Lazer epilyasiyası nədir?

- Lazer epilyasiyası anadan gəlmə, həm də sonradan qazanılmış tüklərin, yaxud hər hansı hormonal pozğunluğun nəticəsində meydana çıxan tüklənmənin qarşısını almaqdır.

- Lazer epilyasiyasının hansı növləri var?

- Hazırda epilyasiyanın aleksandrit, diodlu lazer növləri mövcuddur. Diodlu lazer həm sarı, həm də qara tükləri aradan qaldırır. Lakin aleksandrit lazer əsasən cod tükləri yox edir. Lazer epilyayasiyası zamanı köməkçi metodlar kimi ultrasəs və enzim prosedurlardan da istifadə edilir. Lazer epilyasiyası sağ soğanağının işıq şüaları vasitəsilə məhv edilməsidir. İstifadə olunan dalğa uzunluğu ultrabənövşəyi şüalara malik deyil. Həmin dalğa uzunluğu işıq spektrinə aiddir və buna görə də tamamilə zərərsizdir. Əgər lazer epilyasiyası qeyri-professional şəkildə aparılıbsa, o zaman dəridə müəyyən yanıqlar əmələ gələ bilər. Amma nəzərə almaq lazımdır ki, lazer epilyasiyasının effektivliyi tükün qalınlığından da asılıdır.

- Əməliyyatlar nə qədər çəkir?

- Lazer epilyasiya əməliyyatı tətbiq edilən bölgənin genişliyinə görə dəyişir.

- Neçə seansdan sonra tüklərin çıxması dayanır?

- Prosedurun sayı fərdidir, yəni o, bədənin hissəsindən, yaşdan və hormonal fondan asılıdır. 1 və ya 2 il ərzində tüklərin tamamilə aradan götürülməsi mümkündür. Amma elə adamlar da var ki, istədiyi nəticəni 6-7 seansdan sonra əldə edir.

- Əsasən hansı mövsümdə lazer epilyasiyası etdirmək daha məqsədəuyğundur?

- Lazer epilyasiyası əməliyyatını havaların hələ çox istilənmədiyi və günəşin özünü tez-tez göstərmədiyi aylarda etdirmək daha məqsədəuyğundur. Kəskin günəş şüaları dəriyə əks təsir göstərib onu yandıra bilər.

- Lazer müalicələrindən sonra günəşə çıxmaq təhlükəlidirmi?

- Yay mövsümündə lazer epilyasiyasına gələnlər 1 həftə ərzində kəskin günəş şüalarından uzaq durmağa çalışmalıdır. Hara getdiklərindən asılı olmayaraq, çantalarında günəşin ultrabənövşəyi şüalarından qoruyan SPF tərkibli krem gəzdirməyi məsləhət görürəm.

- Hamilə qadınların lazer epilyasiyası əməliyyatına müraciət etməsi nə dərəcədə düzgündür?

- Hamilə qadınların epilyasiya prosedurundan istifadə etmələri məsləhət deyil. Mən həkim dermatoloq və kosmetoloq kimi heç bir hamilə qadını qəbul etmirəm. Əslində 9 ay ərzində və süd verən müddətdə olmaz. Uşağın inkişafına mənfi təsir göstərə bilər, həm də epilyasiya prosesi tam ağrısız olmadığından hamilə qadınlar bu kimi stressdən uzaq dayanmalıdırlar.

- Menstruasiya dövründə lazer epilyasiya etdirməyə icazə varmı?

- Ciddi bir ziyanı yoxdur, lakin ağrı olduğuna görə, olmaz. Ya 3 gün əvvəl, ya da menstruasiyadan 3 gün sonra gəlmək olar.

- Əməliyyat keçirmiş bir xəstə lazer epilyasiyasına gələ bilər?

- Təəssüf ki, salonların çoxunda əməliyyatdan yeni çıxmış xəstələri də qəbul edirlər. Lakin 3 ay tamam olmamış lazer epilyasiyası etdirmək olmaz.

- Lazer epilyasiyası zamanı ağrı hiss olunur?

- Ağrı çox yüngül olur. Həm də artıq soyutma sistemi var və o ağrını hiss etməyə qoymur.

- Nə qədər vaxtdan sonra duş qəbul etmək olar?

- Yaxşı olardı ki, bir gün ərzində duş qəbul etməsinlər.

- Əməliyyat sonrası losyon-krem, ya da dərman istifadəsi lazımlıdırmı?

- Qızartı meydana gəldiyi təqdirdə qoruyucu və bərpaedici kremlərdən istifadə edilə bilər. Ümumiyyətlə, üzə, bədənə krem və lasyon çəkmək məsləhət görülmür. Çünki qızartının və səpkilərin meydana gəlməsinə səbəb olur.

- Lazer epilyasiyasının zərərləri və əks göstəriciləri varmı?

- Lazer tətbiqləri çox vaxt radiasiya kimi qəbul edilir və zərərli təsir edər meydana gətirə biləcəyi düşünülür. Halbuki lazer ilə radiasiya arasında bir əlaqə yoxdur. Lazer tətbiqi əsnasında dəri altındakı təbəqə və orqanlara hər hansı bir təzyiq göstərdiyinə dair bir təsir müşahidə olunmayıb. Lazerlə bədəndə ancaq ət kökü səviyyəsinə qədər çatıla bilər. Lakin hər hansı bir xəstəlik varsa və bilmədən lazer epilyasiyasına müraciət edərlərsə, zərərləri yarana bilər. Bunlara şiş xəstəlikləri aid edilir. Lazer epilyasiyası onların daha da böyüməsinə səbəb ola bilər. Buna görə də, gəlməzdən əvvəl konsultasiya aparıb hansı xəstəliklərin olduğunu öyrənmək lazımdır. Əgər antibiotik qəbul edirsə, lazer epilyasiyası qətiyyən olmaz. Müalicədən 2 həftə sonra gəlmək olar.

- Lazer epilyasiyasını bədənin hər yerində tətbiq etmək olar?

- Bədənin hər yerində olar, amma dərini yandırmamaq şərti ilə ayrı-ayrı dozalarda. Konsultasiya zamanı fibroma, mioma kimi xəstəliklər aşkarlanmayıbsa, genital bölgələrdə də etmək olar və çox gözəl nəticələr əldə edilir.

- Tüklənmədən həddən artıq əziyyət çəkən kişilər müraciət edirmi?

​- Epilyasiya tətbiqlərinə artıq yalnız qadınlar deyil, kişilər də tez-tez müraciət edir. Kişilər əsasən çiyin, kürək, sinə, boyun- peysər və almacıq sümüklərinin üzərindəki saqqallardan xilas olmaq üçün lazer epilyasiyasının köməyindən istifadə edirlər. Kişilərin lazer epilyasiya tətbiqlərində qadınlarla müqayisədə bəzi üstünlük və qeyri-üstünlükləri var. Kişilərin daha qalın və tünd rəng ət köklərinə sahib olmaları lazerə çox yaxşı cavab verməsinə və çox daha müvəffəqiyyətli nəticələr alınmasına səbəb olur. Kişilərin qeyri-üstünlüyü isə strukturları baxımından yüksək kişilik hormonlarının davamlı yeni ət istehsalı ilə qarşı-qarşıya olmalarıdır. Lakin düzgün müalicə ilə istənilən nəticə əldə etmək olar.

AYTƏN

Xəbər lenti

DAHA ÇOX XƏBƏR