Qəbələnin yüzmininci sakini dünyaya gəlib
Bizi izləyin

Qırmızı.az

Qəbələnin yüzmininci sakini dünyaya gəlib

Bu xəbəri Samid və Seyranə Kərimovlar ailəsinə rayon statistika idarəsi çatdırıb

Qəbələ rayonunun yüz mininci sakini dünyaya gəlib.

AzərTAc-ın verdiyi məlumata görə, rayonun Mirzəbəyli kəndinin sakinləri Samid və Seyranə Kərimovların ailələrində ikinci övlad dünyaya gəlib. Lakin gənc ailə yeni doğulan körpənin rayonun yüz mininci sakini olduğunu bilmirdi. Bu xoş xəbəri ailəyə rayon statistika idarəsi çatdırıb.

Qəbələ Rayon İcra Hakimiyyətinin, idarə və təşkilatların nümayəndələri, KİV əməkdaşları Rayon Mərkəzi Xəstəxanasına gələrək Kərimovlar ailəsinin sevincinə şərik olmuşlar. Yüz mininci sakinin anası Seyranə Kərimova özünü xoşbəxt hesab etdiyini və bu şərəfin onun övladına nəsib olması ilə qürur duyduğunu bildirib, xəstəxanada müayinə və müalicə olunanlara çox böyük diqqət və qayğı göstərildiyini qeyd edib. Əhaliyə göstərilən diqqət və qayğıya görə dövlətimizin başçısı İlham Əliyevə minnətdarlığını bildirən Seyranə Kərimova rayonun yüz mininci sakini olan övladının adını Azərbaycan Prezidentinin şərəfinə İlham qoyduqlarını deyib.

Qəbələ Rayon İcra Hakimiyyəti başçısının müavini Ətayə Osmanova, Qızıl Aypara Cəmiyyəti rayon təşkilatının sədri Sədaqət Bayramova gənc ananı təbrik edərək ona gül dəstəsi və xatirə hədiyyələri təqdim ediblər. Rayon Mərkəzi Xəstəxanasının doğum şöbəsinin müdiri Telli Babayeva Qəbələnin yüz mininci sakininin sağlam, çəkisinin və boyunun normaya uyğun olduğunu bildirib.

Oxumağa davam et
Reklam
Reklam

Gündəm