Yazarlar
“Yazıram ehtirasla öpüşürlər, amma səhnədə belə şey olmur” - BRİFİNQ - FOTO
"Brifinq”in qonağı dramaturq, 25 ildən çoxdur teatr tamaşalarının müəllifi, tanınmış ssenarist Əli Əmirlidir. Əli müəllim ilə son vaxtların ən çox bəyənilən “Şah Qacar” tamaşasını geniş müzakirə etdik. O, tamaşanın uğur sirrini açıqladı.
Ə.Əmirli həmçinin Qarabağ mövzusuna müraciət etməməsinin səbəblərinə aydınlıq gətirdi, “Hasarın o üzü” tamaşasının prototiplərinin adını açıqladı.
Nərgiz Ehlamqızı: Əli müəllim,
qarşıdan yeni dərs ili gəlir. Siz də Mədəniyyət və İncəsənət
Universitetində sənətşünaslıq fakültəsində dərs deyirsiniz. Adətən,
müəllimlər sənətşünaslıq fakültəsində qabiliyyət imtahanı olmasını
istəyirlər. Sizcə, fakültədə qabiliyyət imtahanı
olmalıdır?
- Mən həmişə ilk dərs günündə auditoriyaya girəndə tələbələrə
birinci sualım bu olur ki, bilirsinizmi hansı ixtisasa gəlmisiniz?
Görürəm ki, onların heç anlayışı belə yoxdur. Şübhəsiz ki, belə
tələbələrlə işləmək müəllim üçün çox çətindir. Maraqlı budur ki,
sənətşünaslıq fakültəsində oxumağı ağlına gətirməyən uşaqlarda
istedad olur, yazmaq qabiliyyəti oyanır. Mənim bir tələbəm vardı,
deyirdi ki, “Əli müəllim, biz universitetə gəlirik, gedirik, axı
heç nə öyrənmirik”. Mən də cavab verirdim ki, siz öyrənirsiniz,
xəbəriniz yoxdur, bazanıza nəsə yığılır, universiteti bitirəndən
sonra görəcəksiniz ki, oxumamış adamdan çox-çox fərqlənirsiniz.
Həmin qız ali məktəbi qurtarandan sonra kanalların birində çox
yaxşı jurnalist kimi fəaliyyət göstərdi. Gündəlik nəzəriyyə,
təcrübə və dərslərdəki söhbətlər nəhayətdə hansısa formada üzə
çıxır. Mən özüm qabiliyyət imtahanının olmasının o qədər də
tərəfdarı deyiləm. Bəzən qabiliyyətin yoxlanmasının özü heç
effektli olmur. Test üsulu ilə bilik səviyyəni göstərə bilirsən,
amma qabiliyyət imtahanında insan faktoru ortaya çıxır. Yəni sən
müəllimlə üz-üzəsən, müəllimin istəyindən, ona deyilmiş sözdən nəsə
asılı olur. Bəzən qabiliyyət obyektiv qiymətləndirilmir.
Yaradıcılıq məsələsi elədir ki, hər müəllimin emalatxanasında 4-5
nəfər olmalıdır və onu müəllimin özü seçməlidir, bilməlidir ki,
kimlərlə işləyəcək. Azərbaycan televiziyasında Kinematoqraflar
İttifaqının işçilərinin bizim məzunların olması onu göstərir ki,
Mədəniyyət və İncəsənət Universitetində havayı zəhmət
çəkmirik.
Nərmin Muradova: Universitetə yeni
rektor təyin olundu. Nələr gözləyirsiniz?
- Yeni insan yeni fikir, duyğu, yanaşmadır. Fərəh xanımı
universitetə rektor gəlməzdən qabaq tanıyırdım. Mədəniyyət və
Turizm Nazirliyində şöbə müdiri vəzifəsində çalışırdı və incəsənət
şöbəsi də birbaşa teatrla bağlı idi. Bir neçə dəfə ünsiyyətimiz də
olmuşdu, onu yaxşı kadr hesab edirəm. Fəaliyyətini gələcək
göstərəcək. Çünki ötən təhsil ilinin sonunda gəldi, əsas iş
sentyabrda başlayacaq. Yaxşılığa doğru inam var.
“Pyes yazanda heç bir aktyoru nəzərdə tutmuram”
N.Muradova: Ötən teatr mövsümündə
iki yeni tamaşanızın premyerası oldu. Mövsüm Sizin üçün necə
keçdi?
- Akademik Milli Dram Teatrında “Şah Qacar” və Gənc Tamaşaçılar
teatrında “Hasarın o üzü” əsərləri səhnəyə qoyuldu. Bu əsərlər
ciddi dramatik janrda yazılmış əsərlər idi. Hər iki əsərdən
rezonans gözləyirdim. Əvvəla “Şah Qacar” Qacarla bağlı idi, baş
rolu da Fuad Poladov oynayırdı. Amma Səməd Vurğunun qələmindən
çıxmış çox populyar “Vaqif” pyesinin qarşısına birdən-birə yeni
Qacarı səhnəyə gətirmək çox riskli bir şey idi. Camaat da Qacarı
tarixdən yox, o pyesdən tanıyırdı. O pyes də Qacarı dəhşətli
müstəbid göstərir. Elə bir adam ki, özü haqqında deyir “bir boynu
olsaydı bəşəriyyətin, onu bir qılıncla vurardım, yəqin”. Bunu heç
kəs özü barəsində deməz, amma o pyesdə dedirtdirirlər. Amma o qədər
gözəl deyir ki. Səməd Vurğunun poeziya istedadı o qədər güclü idi
ki, o pyesi hamı əzbər bilirdi. Əzbər bildiyi üçün də hamı Qacarı
müstəbid kimi tanıyırdı. O pyesdən sonra tamam yeni keyfiyyətdə
Qacar gətirmək müəllifdən risk tələb edirdi. Gözləmədiyim halda elə
bir heyət yığışdı ki... Azər Paşa Nemətov rejissorluğu boynuna
götürdü, Fuad Poladov Qacar rolunda səhnəyə çıxdı. Bu iki ad mənim
uğurumu təmin edirdi. Mən bunları gözləmirdim. Əsəri başqa
rejissor, mənim dostum Bəhram Osmanov tamaşaya qoymalı idi. Əsər
yazılan vaxtdan əli onun üstündə idi. Amma elə bir vəziyyət yarandı
ki, Qacarı Azər Paşa Nemətov tamaşaya qoymalı oldu.
N.Muradova: Deyəsən, pyesi çoxdan
Azər Paşa Nemətova vermişdiniz...
- Yox, əsəri mən yox, AZDRAMA-nın direktoru İsrafil İsrafilov
vermişdi. Çünki tamaşa ərəfəsində rejissorlar arasında söhbət
gedirdi ki, əsər kimə veriləcək. Hətta xaricdən rejissor dəvət
etmək fikirləri vardı. Belə alınıb ki, Azər Paşa Nemətova pyesi
verib ki, yaxşı pyesdir, bununla maraqlan. Azər Paşa da o
rejissorlardandır ki, pyesi özününkü eləməyincə ona girişmir. Onu
bişirib tamam sevəndən sonra tamaşaya qoyur. Hətta ona elə gəlir
ki, pyesi özü yazıb artıq. Mən böyük səbr və hövsələ ilə bütün
bunlara dözdüm. Çünki məndə teatrla məşğul olduğum 25 il müddətində
rejissorlarla işləmək immuniteti yaranıb. O immunitet mənə teatrı
anlamaq, onun kollektiv sənət olmasını bilmək üçün kömək edib. Pyes
tamaşaya qoyulanda səninlə pyes arasına çox adam girir. Birinci
rejissor girir, o dartıb bəstəkarı, rəssamı, aktyorları gətirir.
Sənin sevmədiyin aktyor da, bəstəkar da ola bilər. Amma bu, sənin
istəyindən asılı deyil. Müəllif ikinci və üçüncü planda
qalır.
N. Muradova: Amma nə tənqid və
ittiham olursa, müəllifün ünvanına deyilir...
- Tək müəllifə yox, daha çox rejissora gəlir. Tamaşa yaxşıdırsa,
birinci rejissorun işidir. Tamaşa pisdirsə, söyülən rejissor
olmalıdır. Pisdirsə, dramaturgiya zəifdirsə, niyə onu götürürsən,
bəstəkar, yaxud aktyor zəifdirsə, niyə zəiflər ilə işləmisən?
Rejissor seçir bunları. Adətən, teatrda tamaşa qoyulanda
deyilməlidir ki, rejissorun tamaşasıdır. Necə ki, afişada yazılır
Azər Paşa Nemətov Əli Əmirlinin “Şah Qacar” əsərini təqdim edir.
Necə ki, afişada birinci ad rejissorun adı gedir. Mən bundan
incimirəm, məmnuniyyətlə qəbul edirəm. Azər Paşanın çox böyük
rejissor olduğunu, məsuliyyətlə işlədiyini gördüm. Təəccübləndim
ki, bütün fəxri adları, mükafatları almış adam işinə bu qədər
məsuliyyətlə yanaşarmış. O, heç nədə güzəştə getmir. Fuad Poladovun
oyunu isə məni heyran elədi.
“Tarixi mövzuda serial çəkə bilmərik”
N.Ehlamqızı: Bəzi saytlarda
yazılmışdı ki, aktyorlar tamaşada oynamaqdan imtina
edib...
- Bizim saytların hərdən uydurması olur. Xəbər başlığında gördüm,
ki, AZDRAMA-da aktyorlar tamaşadan imtina edir. Dedim, görəsən, bu,
nə tamaşadır ki, aktyorlar imtina edir. Baxıram ki, “Şah Qacar”.
Halbuki, “Şah Qacar” 6 aydır, anşlaqla gedir, daha ajiotaj yaradıb,
elə bir mətbuat orqanı yoxdur ki, dəfələrlə bunun haqqında tərifli
resenziyalar çıxmasın. Xəbərdə imtina edənin adı yoxdur. Sonra
yadıma düşdü ki, Əli Nur məşqlərdə ikinci dərəcəli rollardan birini
oynayırdı. Elə oldu ki, Azər Paşa onu tamaşadan ayırdı. Deməli, bu
adam 6 aydan sonra jurnalistin cənginə düşüb, o da necə olubsa
deyib guya imtina ediblər. Əsərin ilk oxunuşunda Əli Nur mənə
yaxınlaşdı ki, Əli müəllim, Qacar tarixdə belə edib, elə olub. Mən
də qısaca dedim ki, mən tarixi bilmirəm, pyes yazıram. Pyesi yazmaq
üçün mənə lazım olan şeyləri öyrənmişəm, çox dərinliklərə getmirəm.
Pyes elə bir şeydir ki, əvvəldən sonadək bir süjet getməlidir və
hər şey də onun ətrafında olmalıdır. O xəbəri oxuyanda bildim ki,
Əli Nurdur. Deməli, xəbərdə yazılmışdı ki, müəllif dedi ki, mən
tarixi bilmirəm, biz də dedik ki, sən tarixi bilmirsənsə, niyə
tarixi mövzuya müraciət edirsən. Şərhlər də getmişdi ki, afərin
aktyorlarımıza (gülür). Yəni biz olduq heç nə. Təbii ki, mən buna
reaksiya vermədim. Belə şeylər teatrda olur. Resenziyaların çoxunda
yazılırdı ki, biz Ədil İsgəndərov teatr ruhunu yenidən zala
gətirdik. Zal belə alqışlar görməmişdi. 1 il içərisində tamaşa
AZDRAMA-da 25 dəfə oynandı. Bu, rekord göstərici idi. Heç vaxt bir
əsər indiki zamanda bir mövsümdə 25 dəfə oynanmır.
Dilqəm Əhməd: Bəzən iddia olunur
ki, “Vaqif” pyesi yazılanda Sovet hökuməti Səməd Vurğuna sifariş
verib, ilkin nüsxəsi bərbad olub, Qacar daha çox təhqir edilib.
İllər sonra daxili vicdanınızın səsini eşidib yazdınız, yoxsa
sifariş verilib ki, əksini yazın?
- İnanmıram ki, Səməd Vurğuna “Vaqif”i yazmaq sifariş olunub. Hesab
edirəm ki, zamanı üçün bu, çox gözəl pyes idi. Səməd Vurğunun
içindən gəlib yazıb, şübhəsiz ki, o, dramaturq deyildi. Ədil
İsgəndərov teatrı bilən adam idi. O rejissor deyirdi ki, bu səhnəni
belə yazaq, belə edək. Bu, sifariş deyildi, rejissorun istəyi idi.
Mənə pyesi yazanda hər hansı sifariş verilməyib. Mən Jan Gevrin
“Xacə şah” əsərini oxuyanda qərara gəldim ki, belə bir pyes
yazacağam. Amma bu qərarla pyesin yazılması arasından təxminən 10
il keçdi.
N.Muradova: Bəs “Hasarın o üzü”
niyə “Şah Qacar” kimi ajiotaj yarada bilmədi?
- Azərbaycanlılar teatr deyəndə birinci AZDRAMA-nı nəzərdə tuturlar
və daha çox tamaşaçı ora gedir. “Şah Qacar” bu teatrda tamaşaya
qoyuldu. Əslində, “Hasarın o üzü” Gənc Tamaşaçılar Teatrında uğur
qazandı. “Varlı qadın” 4 il Gənclər teatrında getdi, amma ölkədə
elə bir rezonans olmadı. Elə ki, “Varlı qadın”ı Bəhram Osmanov
AZDRAMA-da tamaşaya qoydu, rezonans oldu və yayıldı. Kimin tamaşaya
qoyması, kimlərin oynaması, reklam məsələsinin təsiri var.
AZDRAMA-nın adı var, ad çox vacibdir. “Hasarın o üzü” orada
olsaydı, başqa bir şey olardı.
“Humayın prototipi həyat yoldaşımdır”
N.Muradova: İlyas Əfəndiyev vaxtilə
məhz Amaliya Pənahova üçün rollar yazırdı. Sizin üçün elə bir
aktyor varmı, onun üçün yazasınız?
- Pyes yazanda heç bir aktyoru nəzərdə tutmuram. Pyes yazılandan
sonra müəyyən edirsən ki, filan aktyor oynamalıdır. Məsələn,
“Hasarın o üzü” pyesini yazanda istəyirdim ki, burada Həmidə
Ömərova oynasın. Baxmayaraq ki, Həmidə Ömərova ömründə səhnəyə
çıxmayıb, o, kino aktrisasıdır, 50 yaşdan sonra səhnəyə çıxmaq çox
çətin bir şeydir. Bilirdim ki, bu, fantastikadır. Gənc Tamaşaçılar
Teatrının direktoru, baş rejissor mənim dostumdur, iki dostum olan
yerdə mənim istəyimi nəzərə aldılar. Dedim ki, çox istərdim baş
rolda Həmidə Ömərova oynasın. Şübhə etdilər ki, o, heç səhnəyə
çıxmayıb, görünür, onlar mənə inandılar və düşündülər ki, ilk
dəfədir Həmidə Ömərova səhnəyə çıxır və bizim teatra gəlir,
alınacaq. Nurəddin Mehdixanlını da tamaşa üçün AZDRAMA-dan dəvət
etdilər. Humay rolu elədir ki, o rolu məhz Həmidə xanım oynamalı
idi. Onun orucu, namazı var, ümumiyyətlə, hər bir cəhətdən mənim
hörmət etdiyim xanımdır. Gənc Tamaşaçılar Teatrının aktyorları
bunun əleyhinə gedirdilər ki, alınmayıb. Amma mən müəllif kimi
görürəm ki, alınıb. Səhnədə çox məlahətli aktrisadır. O tamaşaya
kim gəlibsə, ola bilməz ki, mənə təşəkkür eləməsin, aktrisanı
görmək istəməsin.
“Qatil”dəki erotik səhnələrdə pintilik görürəm"
N.Ehlamqızı: Əli müəllim, “Qatil”
tamaşası ətrafında çoxlu müzakirələr getdi. Açıq-saçıq səhnələr
xüsusən yaşlı nəsil arasında qınanıldı. Sizcə, cəmiyyət o tipli
səhnəyə hazır deyil?
- “Qatil” tamaşasının hər iki quruluşuna baxmışam. İkisini də
Mehriban Ələkbərzadə qoyub. Birinci hamının qəbul edə biləcəyi
formatda tamaşaya qoyulmuşdu. Mehriban xanım 10 ildən sonra o əsərə
müraciət edəndə, təbii ki, əvvəlkini təkrar etməyəcəkdi. Rejissor
bir əsərə yenidən müraciət edirsə, deməli, onun artıq başqa fikri
var. Hesab edirəm ki, tamaşa yaxşıdır. Münəvvər Əliyeva da, Hikmət
də sübut elədi ki, çəkinmədən, komplekslərdən azad olaraq mürəkkəb
rolları ifa edə bilərlər. Bununla belə, tamaşaçı rəyi vacib şeydir.
Elə məqamlar var ki, onları qırıb atmaq da olar. Bir qədər erotik
səhnələrdə pintilik görürəm. Amma hesab edirəm ki, dəhşətli bir şey
yoxdur. Bir-iki nəfər nəsə söz deyibsə, hansısa jurnalistin bundan
istifadə edib hay-haray qaldırması mənasız bir şeydir.
N.Muradova: Sizin əsərinizə
rejissor o cür səhnələrin olmasını vacib bilsə,
razılaşarsınız?
- Təbii ki. Əvvəla vəziyyət tələb edirsə, o olmalıdır. Məsələn,
“Mən səni sevirəm” tamaşasında yazıram ki, onlar ehtirasla
öpüşürlər, amma onlar səhnədə öpüşmürlər. İndi mən neyləyim?
(gülür) Onlar ehtirasla yox, heç yalandan da öpüşmürlər. Qorxurlar
da camaatdan. Məhəbbətdirsə, öpüş də olmalıdır da. Remarkada bunu
yazıram.
“Serial üçün hazır ssenarilərim var”
Bəxtiyar Məmmədli: Televiziya
tamaşaları üçün ssenariləriniz olur?
- Mənim televiziyada ilk təcrübəm “Bala başa bəla”dır. 1995-ci ildə
efirə gedib, bu günə qədər də göstərilir, camaatın yadındadır. O
vaxt yadımdadır, dəhşətli rezonans oldu. Düşündüm ki, televiziyalar
sifarişlər verəcək. Heç bir sifariş olmadı. Mən dəfələrlə serial
üçün hazır ssenarilərimin olduğunu elan vermişəm, amma
maraqlanmıram. Hətta ssenarini götürüb baxırlar görürlər ki, bunu
etmək çətindir. Buna ciddi aktyor oyunu, yaxşı rejissor və daha çox
xərc lazımdır. Axı professional yazıçı küçə söhbətləri yazmayacaq
ki, bunu hər yerdə demək olsun. Burada əsl xarakterlər var. “Cənnət
qapıları” adlı ssenarim var ki, orada 30-a yaxın güclü aktyor
lazımdır. Gənc rejissor oxudu, dedi ki, mən serial ssenarisindən
qorxdum.
N.Muradova: Siz əsəri prodüserlərə
özünüz verirsiniz?
- Mən bircə AzDRAMA-ya və Gənc Tamaşaçılar Teatrına əsər təqdim
edirəm. Başqa teatrlar əsərlərimi ordan-burdan götürüb tamaşaya
qoyurlar. Bəzən heç özümdən soruşmurlar. Uzaqbaşı deyərlər “Əli
müəllim, filan pyesinizin bir nüsxəsini verə bilərsiniz”, mən də
elektron ünvanlarına göndərərəm. Xarici ölkələrdən Tacikistan,
Özbəkistan, Qırğızıstan, Qazaxıstan, Dağıstanda və bədbəxt Krımda
mənsiz tamaşaya qoyublar.
N.Muradova: Qonorar
alırsınız?
- Heç biri qonorar göndərmirlər. Çünki hər biri bədbəxt ölkələrdir.
Azərbaycandan heç qonorarını ala bilmirsən. Tacikistandan necə
alacaqsınız?
D.Əhməd: Aktyorlarımız kimi
dramaturqlarımız da bu sarıdan əziyyət çəkir?
- Mənim belə prinsipim var: “şikayətlənmə və istəmə". Bu iki
prinsipə əməl etməyə çalışıram. Camaat roman yazır, bir qəpik
qazanmır. Sən 50 səhifəlik pyes yazırsan, 3-5 min manat Mədəniyyət
və Turizm Nazirliyi verir. “Şah Qacar" mənə yaxşı gəlir gətirir.
Hər nümayişdə mənə qonorar gəlir. Bu mənada, dramaturqun Azərbaycan
şəraiti üçün əsası yoxdur.
N.Muradova: Artıq neçə serial
çəkilib, bəyəndikləriniz var?
- Mən heç bir seriala baxa bilmərəm. Hətta bilirəm tələbələrim
yazırlar, haradasa deyirəm baxım. Görürəm 10 dəqiqədən artıq baxa
bilmirəm. Baxdığım sonuncu serial “Möhtəşəm Yüzil"dir. Ona da
serial kimi yox, film kimi baxdım. Gözəl rejissor, dramaturq işi
var, aktyor işi, musiqisi parlaqdır. Buna baxmağa dəyər. 80
seriyadan sonra gördüm təkrarlar gedir, dramaturq vəfat edəndən
sonra serialın dramaturji keyfiyyəti aşağı düşdü və
baxmadım.
D.Əhməd: Şah İsmayıl Xətai ilə
bağlı o cür serial çəkə bilmərik?
- Yox, bizdə tarixi mövzuda serial çəkə bilməzlər. Bu yaxınlarda
hansısa mövzuda çəkilişdən şəkillər gördüm, dekorasiyadan ətim
ürpəşdi. “Möhtəşəm Yüzil"ə baxandan sonra tarixi mövzuda belə şeyə
baxmaq mümkünsüzdür. Kino dramaturqlarımızın nəyə qadir olduğunu
çox gözəl bilirəm. Artıq imza mənə çox şey deyir.
N.Muradova: Bayaq dediniz ki, iki
prinsipiniz var: şikayətlənmə və istəmə. Əli müəllim ad
istəyirmi?
- Təbii ki, istəyirəm. Amma içimdə istəyirəm. Yaşadığın cəmiyyətlə
ayaqlaşmalısan. Nəyisə almaq istəyirsənsə, bunu ləyaqətlə almaq
lazımdır. Ləyaqətlə yaşamağı bacarmalısan. Ləyaqətlə yaşayan adam
nə şikayətlənməz, nə istəməz.
N.Muradova: Sizdən az haqqı olan
biri ad alanda nə hisslər keçirirsiniz?
- Sakit yanaşıram. 25 ildir Azərbaycan teatrlarının repertuarında
daim Əli Əmirlinin əsərləri varsa, o, artıq onun üçün böyük
mükafatdır. Heç bir teatr yaxşı pyesdən imtina eləmir. Hər hansı
təsir rıçaqım - vəzifəm, pulum, qohumlarım yoxdur. Teatra
keyfiyyətli əsər verirəm. Teatrlar, Mədəniyyət və Turizm Nazirliyi
mənə mane olmur. AZDRAMA-da mənim əsərlərimin oynanmasının ən əsas
səbəbkarlarından biri Bəhram Osmanovdur. Öz rejissorunu tapmalısan.
O, həmişə deyirdi ki, mən Əli Əmirlinin əsərlərinə görə vuruşaram.
Həsən Turabov özü məni teatra dəvət etsə də, birinci tamaşanı
Bəhram Osmanov AZDRAMA-da keçirib. Gənc Tamaşaçılar teatrında
“Ərizə" əsərim tamaşaya qoyulandan sonra məni çağırdı ki, Sizinlə
çalışmaq istəyirəm. Hətta özü istəsə də, AZDRAMA-da ilk tamaşam 4
ildən sonra səhnəyə qoyuldu. O da Osmanov inad elədi ki, bu əsər
tamaşaya qoyulmalıdır. Yaxşı pyesi hamı məmnuniyyətlə
istəyir.
N.Muradova: İsrafil İsrafilovun bir
fikri vardı ki, Siz pyes vermisiniz, o da deyib ki, pyesin 20
səhifəsi sözdür, hadisə baş verməyib. Bu, nə məsələ
idi?
- İki aktrisa üçün “Baş rol" adlı pyesim var, O pyesi İsrafil
müəllimə verdim ki, oxusun. Heç tamaşaya qoymaq üçün nəzərdə
tutmamışdım. O da pyesi oxuyub, sonra görüşəndə dedi ki, Əli
müəllim, pyesi oxudum, çox xoşuma gəldi, amma bir şey var ki, 10-15
səhifə oxumuşam, hadisə yoxdur. O, mənə Tofiq Kazımovdan, İlyas
Əfəndiyevdən misallar gətirdi ki, hadisə olmalıdır. Doğrudan da,
pyesdə hər 5-10 dəqiqədən bir qəribə bir hadisə olmalıdır. Dedim
ki, ola bilər, buna baxmaq olar. Mən heç vaxt kiməsə yapışmıram
tamaşaya qoyun. Pyesi verirəm, düşünür, bəyənirsə, tamaşaya
qoyurlar. İsrafil müəllimə axırıncı dəfə oxumaq üçün pyes vermişəm,
mənə zəng etmir, heç vaxt soruşmayacağam. Əgər onun çox xoşuna
gəlmiş olsaydı, deyərdi. Bu söhbəti də şişirtdilər ki, Əli Əmirli
tənqid olunub, İsrafil İsrafilov deyib ki, pyes vermisiniz, 18
səhifə oxudum, heç nə yoxdur. O biri dramaturqlar da başlayıb ki,
əgər Əli Əmirlinin tamaşaları qoyulur, onun haqqında belə deyibsə,
o birilərə nə deyəcək. Mən bilirəm də nə deyib. Bunu o mənada
demişdi ki, hətta Əli Əmirliyə bunu deyirəmsə, niyə filankəslər
inciyir?
N.Ehlamqızı: Yeni pyesinizin hansı
mövzuda olduğunu bilmək olar? Tarixi mövzuda idi?
- Qaçqınlar barədədir. Bir jurnalistin müharibə qeydləri vardı,
onlardan birini oxudum, məni dəhşət tutdu. Rayona gedib, hələ
kəndləri tutulmayıb, amma Cəbrayıl işğal olunub. Atası deyir ki,
niyə gəlmisiniz, bacını da götür qayıt Bakıya, biz də gələcəyik.
Bunlar 3 gün qatarla gəlib Bakıya çata bilmir. Horadizlə İmişli
arasında qalır, 3 gün zülm çəkiblər. Mən hər şeyin 1 vaqon
içərisində baş verdiyi bir pyes yazdım.
“Ağdamlı olsam da, Qarabağla bağlı heç nə yazmamışam”
N.Muradova: Mövzu Sizə yaxın idi?
Çünki ağdamlısınız, bilirəm...
- Ağdamlı olsam da, “ heç nə yazmamışam. O qədər də yazılmasının
tərəfdarı deyiləm. Yazılanları görürəm, qətiyyən bəyənmirəm. Faciə
o qədər dərin və istidir ki, onun bədii həqiqətini tapmasan, onu
heç vaxt səhnəyə qoymaq olmaz. Çox vaxt səhnəyə haray, qışqırıq,
ağlaşma, nalə qoyurlar, elə tamaşalara baxa bilmirəm. ”Fəryad"
filminə baxmıram.
N.Muradova: “Dolu” filminə
baxmısınız?
- Baxmışam. Qarabağ mövzusu çox çətin mövzudur. Hətta mənim
yazdığım pyes müharibə haqqında olsa da, müharibədən deyil. Qaçqın
vəziyyətinə düşən, müharibə prosesləri başlayan zaman insanların
vəziyyəti öz əksini tapıb. O vaqonda sonra yaşayanlar oldu, hamilə
qadın vardı, əkiz uşağı oldu. Biri ali məktəbə girdi, o biri ərə
getdi, həmin o vaqonda yaşadı, onların taleyi idi o
vaqon.
N.Ehlamqızı: Azərbaycanlılar
qələbəyə acdır. Niyə Qarabağla bağlı nikbin əsərlər
yazılmır?
- “Dolu” niyə yaxşı filmdir? Çünki çox yaxşı sonluq tapa biliblər.
Məğlub olmuş ölkə qələbə filmi çəkə bilməz. Qələbə filmi deyilsə,
ziyanlıdır, ancaq əzablarını göstərəcəksiniz. “Dolu”da, bəlkə
sonluq orijinal deyil, amma o şey ki ikinci dəfə də təkrar olunanda
sənin qəlbinə təsir edirsə, deməli yaxşıdır. “Dolu”da qəhrəmanlıq,
kişilik, məsələnin mahiyyəti, məğlubiyyətin səbəbləri görünür, eyni
zamanda, çox gözəl sonluq var. Yəni, qəhrəmanların cismi məhv olsa
da, ruhları onların Ağdamda, Qarabağ torpağındadır.
N.Muradova: Yayda necə istirahət
edirsiniz?
- Nədən istirahət edək? Mənim üçün dərs demək də, yaradıcılıqla
məşğul olmaq da ləzzətli işdir. Ona görə də nədən istirahət
eləməliyəm?! Bakıdayam, iyul-avqust ayları mənim ən məhsuldar
işlədiyim aylardır. Başqa vaxt təzə əsər yazmıram.
N.Muradova: Yazanda şərtiniz nədir?
Sakitliyi xoşlayırsınız?
- Yox. Həyat yoldaşım o gün məni yeməyə çağırmaq istəyir, deyir
səni ayırmaq istəmirəm. Dedim Cəfər Cabbarlı deyiləm ki, deyim
korladın nəyisə (gülür)
N.Ehlamqızı: İlk oxucunuz
xanımınızdır?
- Hə, əgər o əsəri bəyənirsə, deməli, yaxşı əsərdir. Həyat yoldaşım
da sadə adam deyil. O, uzun illər Sovet dövründə məşhur televiziya
jurnalisti olub, mədəniyyət sahəsində işləyib. Bu saat Space
televiziyasında dini proqramda çalışır. Yoldaşım “Hasarın o
üzü”ndəki Humayın prototipi Solmaz Əmirlidir. Yeri gəlmişkən, kişi
də mənəm, bir qızlar bizim deyil, bizim qızlarımız tərbiyəlidir
(gülür). Solmaz xanımın çox yüksək zövqü və intuisiyası var.
Tamaşaçı kimi qəddar deyil, axı məni sevir (gülür). Amma ehtiyatla
olsa da, deyir ki, bu əsər tutmayıb. “Sevən qadın” əsərini qəbul
etmir.
N.Muradova: Neçə övladınız
var?
- İki qızım, altı nəvəm var. Qızlarım həkimdir. Nəvəmin böyüyünün
17 yaşı var. 4 qız nəvəm var.
Nərgiz EHLAMQIZI
FOTO: Elçin Murad
-
Magazin123:26
Xumar Qədimova daha bir məşhur şeiri mahnıya çevirdi - VİDEO
-
İnanc23:02
Həcc ziyarəti ilə bağlı zəvvarlara XƏBƏRDARLIQ
-
Region22:37
Başqa çıxış yolumuz yoxdur - Paşinyan
-
Hadisə21:47
Dörd aylıq körpə binadan necə düşüb? - Hadisə yerindən GÖRÜNTÜLƏR
-
Magazin121:35
Günelə nə olub? - Xəstəxanadan görüntüsünü paylaşdı və... - FOTO
-
Hadisə21:10
Qırmızı işıqda keçən nazirin maşını aşdı - FOTO
-
Magazin120:22
Müğənni Yalının qohumu sevgilisi tərəfindən qətlə yetirildi - FOTO
-
Dünya19:57
Zelenski onu yeni vəzifəyə təyin etdi