Tatar peraşkisi - Resept

Publika.az-ın mətbəx bölməsi dadı damağınızdan getməyəcək tatar peraşkisinin reseptini təqdim edir:

İnqrediyentlər:

100 qram kərə yağı

2 stəkan un

Bir çimdik duz, soda

1 stəkan kefiri

2 yumurta

İçlik hazırlamaq üçün:

Ət

Kartof

Soğan

Duz

İstiot

Hazırlanma qaydası:

100 qram kərə yağını əridin, un, duz, soda əlavə edin, qarışdırın. Sonra 2 yumurtanı, 1 stəkan kefiri və ya qatığı əlavə edirik. Xəmir yoğurun, lazım olarsa un əlavə edin. Xəmir pelmeni xəmiri kimi yumşaq olmalıdır.

İçi hazırlayın. Çiy kartofu, soğanı, əti kubik formasında doğrayın. Duz, istiot qarışdırın.

Xəmirdən balaca kökə düzəldin, gürcü xəngəli kimi. Ortasını boş saxlayın. Ortasına hazırladığınız içi qoyun, kənarlarını bükün.

Soba tavasına yağlı kağız sərin, 200 dərəcədə bişirin. 20 dəqiqədən sonra sobaya nəzər salın, peraşkilərin içində maye yaranacaq. Onda hər bir peraşkinin içərisinə bir qədər kərə yağı qoyun və tavanı yenidən sobaya qoyun.

20 dəqiqədən sonra yenidən sobaya baxın. Peraşkilər qızarmağa başlayır, daxilindəki bulyon qaynayır. Peraşkilərin üzərinə yumurta çəkin, qaşıqla içliyi yüngülcə basın.

Daha 15 dəqiqə sobada qızardın, peraşkilər hazırdır. Peraşkiləri bir qazana yığın, qapağını örtün. Soyuyanda yeyə bilərsiniz.

Nuş olsun!