Avropa ABŞ-ın Ukrayna ilə bağlı sülh planına qarşı çıxdı

Avropa ölkələri ABŞ-ın dəstəklədiyi Ukrayna üçün sülh planına qarşı çıxıblar.

Publika.az xəbər verir ki, bu barədə "Reuters" agentliyi mənbələrə istinadən məlumat yayıb.

Bildirilib ki, Vaşinqtonun irəli sürdüyü şərtlər Kiyev "kuratorları" tərəfindən faktiki kapitulyasiya kimi qiymətləndirilir.

Nəşrin iki anonim mənbəsi qeyd edib ki, Ağ Ev Ukrayna prezidenti Vladimir Zelenskiyə ABŞ tərəfindən hazırlanmış və münaqişənin dayandırılmasını nəzərdə tutan çərçivə sənədini qəbul etməli olduğunu aydın şəkildə göstərib. Sənədin tərkibinə ərazi güzəştləri və Ukrayna ordusuna müəyyən məhdudiyyətlər daxildir.

Məqalədə vurğulanır ki, ABŞ-ın diplomatik səylərinin sürətlənməsi Kiyev üçün əlverişsiz bir vaxtda baş verir: Ukrayna Silahlı Qüvvələri ön xəttdə vəziyyəti itirir, Zelenski hökuməti isə korrupsiya qalmaqalı ilə sarsılıb.

Bununla belə, Brüsseldə toplaşan Avropa İttifaqının xarici işlər nazirləri hələ tam açıqlanmayan ABŞ sülh planı barədə çox geniş şərhlərdən çəkiniblər.

“Məqaləyə görə, onlar açıq şəkildə bildirdilər ki, Kiyevin güzəştlərə görə cəzalandırılması tələblərini qəbul etməyəcəklər və heç bir razılaşma Ukraynanı özünü müdafiə imkanlarından məhrum etməməlidir”, - agentlik yazıb.