Avropada dövlət parçalanır – ilk addım atıldı

Kataloniya parlamenti İspaniyadan ayrılaraq müstəqil dövlətin qurulması prosesini başladan layihəni qəbul edib.

Publika.az xarici mediaya istinadən xəbər verir ki, layihə Kataloniyanın 18 ay ərzində müstəqil olmasını nəzərdə tutur.

Layihədə Kataloniyanın tam müstəqilliyinin zəmanət altına alınması üçün 30 gün ərzində ictimai təhlükəsizlik və büdcə sisteminin qurulması istənilir. Layihənin müəllifi 27 sentyabr parlament seçkilərində qələbə qazanan Junts Pel Si (“Bəli” üçün Birlik) və hökümətin qurulması üçün onunla danışıqlar aparan Xalq Birliyi Koalisiyasıdır.

“Milyonlarla insan illərdir bu günü gözləyir və təxminən iki milyon adam müstəqil dövlət üçün səs verib. Bu proses artıq başlanıb. Bu gün olmasa da sabah Kataloniya müstəqil olacaq, biz olmasaq da başqaları bu ölkəni müstəqil edəcək”, - Junts Pel Sini təmsil edən millət vəkili Raul Romeva çıxışında deyib.

Müstəqillik əleyhdarı olan siyasi partiyalar isə sənədi sərt şəkildə tənqid ediblər. İspaniyada iqtidarda olan Xalq Partiyasının Katalonyadaki qolu PPC-ninnin lideri Qarsiya Albiol müstəqilliyin əlavə problemlər yaradacağını bildirib. O, Kataloniyanın İspaniyadan ayrılmasına əsla icazə verməyəcəklərini söyləyib.