“Bu ölkələrdə nüvə silahları yerləşdirilərsə...” - Moskvadan TƏHDİD

Rusiya Şərqi Avropa və Baltikyanı ölkələrdəki ABŞ və NATO bazalarında nüvə yüklərinin mümkün yerləşdirilməsinə operativ reaksiya verəcək.

Publika.az “RİA-Novosti” agentliyinə istinadən xəbər verir ki, bu haqda Rusiya Federasiya Şurasının müdafiə və təhlükəsizlik komitəsinin sədr müavini Frans Klinseviç bildirib.

“Əgər ABŞ-ın aviasiyası nüvə yükləri ilə Şərqi Avropa və Baltikyanı ölkələrində ABŞ və NATO-nun bazalarında, həmçinin keçmiş sovet və Varşava təşkilatına üzv ölkələrin aerodromlarında yerləşdirilərsə, Rusiyanın bu hədəflərə cavabı operativ olacaq. Rusiya özünü bu təhlükələrdən müdafiə etməyə məcburdur”, - rusiyalı senator deyib.

Qeyd edək ki, fevralın 2-də ABŞ-ın nüvə doktrinasını açıqlanıb. ABŞ prezidenti Donald Tramp bəyan edib ki, sənəd əvvəlki prezidentlər tərəfindən uzun müddət təxirə salınan Amerika nüvə üçlüyünün (hərbi aviasiya, qitələrarası ballistik raketlər, sualtı qayıqlar) modernləşdirilməsini təsdiqləyir. Doktrinada deyilir ki, ABŞ bütün dünyada F-35 təyyarələri də daxil olmaqla, nüvə yüklərini daşıya bilən aviasiyanı yerləşdirəcək.

ABŞ-ın yeni nüvə doktrinasında Rusiya, Çin və KXDR Asiya-Sakit Okeanı regionu üçün təhlükə adlandırılıb.

Ömər Dağlı