Dünya

Ermənistanda günün fotosu: Paşinyanı onlar hakimiyyətə gətirib?

6 May 2022 08:33

Ermənistanda baş verən silsilə etiraz aksiyaları fonunda sosial şəbəkələrdə paylaşılan bir foto böyük müzakirələrə səbəb olub.

Publika.az erməni mediasına istinadla xəbər verir ki, 2018-ci ildə hazırkı baş nazir Nikol Paşinyanı hakimiyyətə gətirən kütlələrin fotosu ilə budəfəki mitinqdə iştirak edənlərin şəkilləri müqayisə edilib.

2018-ci ilin mitinqləri zamanı çəkilən fotoda Nikol Paşinyanın etirazçı tərəfdarları Ermənistan bayrağını bir avtomobilin üzərinə sərərək qumar oynayırlar. İkinci foto isə iki gün əvvəl çəkilib. Həmin şəkildə iki tələbənin dərs çalışdığı görüntülənib.

Sosial şəbəkələrin Ermənistan seqmentində yüzlərlə insanın paylaşdığı fotoda "Paşinyanı qumarbazlar hakimiyyətə gətirdi, ona görə də Nikol Qarabağı azərbaycanlılara verdi" kimi şərhlər yazılıb.

Hətta bəziləri "qumarbazların hakimiyyətə gətirdiyi də qumarbaz olar, satqın Nikol!" kimi fikirlərlə hazırkı Ermənistan hakimiyyətinin ünvanına ittihamlar irəli sürüblər.