Bu ölkə dünyanın ilk taxta peykini buraxacaq

Kioto Universitetinin yapon alimləri dünyanın ilk taxta kosmik peyki olan "LignoSat"ı yaradıblar.

Publika.az xəbər verir ki, bu barədə "Guardian" qəzeti məlumat yayıb.

"LignoSat" Beynəlxalq Kosmik Stansiyada il boyu aparılan sınaqlarda üstün sabitlik və çatlara davamlılıq nümayiş etdirən maqnoliya ağacından hazırlanır.

Yaradıcıların fikrincə, taxta zond iki problemi həll etməlidir - resurslara qənaət və ətraf mühitə təsirin azaldılması.

“Bütün peyklər Yer atmosferinə yenidən daxil olduqda yanır və uzun illər atmosferin yuxarı qatında üzəcək kiçik alüminium oksid hissəcikləri yaradır. Bu, son nəticədə Yerin ətraf mühitinə təsir edəcək”, - deyə Kioto Universitetinin yapon astronavtı və aerokosmik mühəndisi Takao Doi xəbərdarlıq edib.

"LignoSat 2024"cü ilin yayında orbitə buraxılmalıdır. O, oraya BKS-in təchizat gəmisi "Orbital Sciences Cygnus" və ya "SpaceX"in "Dragon" raketi ilə çatdırılacaq.

Zondun yaradıcıları taxta peykin Yerə yaxın kosmosda ən azı altı ay qalacağını gözləyirlər.

Hüseyn İbadlı