Medvedyev yeni hökumətini açıqladı

Rusiyanın baş naziri Dmitri Medvedyev prezident Vladimir Putinlə görüşdən sonra Nazirlər Kabinetinin yeni tərkibini açıqlayıb.

Publika.Az-ın məlumatına görə, Medvedyev kabinetin 75 faizinin dəyişdiyini bildirib.

Medvedyevin yeni kabinetində Kremlin mətbuat katibi Vladislav Surkov, Kremlin iqtisadi məsələlər üzrə müşaviri Arkadi Dvorkoviç, Qafqaz qubernatoru Aleksandr Xloponin və Moskva bələdiyyəsinin səhiyyə və təhsil işləri üzrə rəhbəri Olqa Qolodets baz nazirin müavini postuna gətiriliblər.

Baş nazirin müavinləri Dmitri Roqozin və Dmitri Kozak yeni kabinetdə də eyni vəzifədə qalacaqlar.

Rusiyanın iki önəmli nazirliyi Xarici İşlər və Müdafiə nazirliklərində dəyişiklik olmayıb. Xarici işlər naziri Sergey Lavrov və müdafiə naziri Anatoli Serdyukov öz yerlərini qoruyublar.

Rusiya enerji naziri Sergey Şmatkonun yerinə Aleksandr Novak təyin olunub.

Ən önəmli dəyişiklik isə Daxili İşlər Nazirliyində olub. Rəşid Nurqaliyevin yerinə Moska polisinin rəhbəri Vladimir Kolokolçev gətirilib.

Anar Əhmədov

Publika.Az