Dünya

İranın bank sistemində çöküş – ATM-lər də işləmir

17 İyun 2025 17:32

İsrail-İran arasında davam edən gərginlik İranın maliyyə sisteminə də zərbə vurub.

Publika.az xəbər verir ki, İranın ən iri dövlət banklarından olan "Bank Sepah"ın bir çox filialı bu gün fəaliyyətini dayandırıb.

Müştərilər hesablarına daxil ola bilmədiklərini, banklara yaxınlaşdıqda isə filialların bağlı olduğunu gördüklərini bildiriblər.

Eyni zamanda "Bank Sepah"ın ölkə üzrə yayılmış ATM-ləri də işləmir. Qeyd olunur ki, İran Silahlı Qüvvələri ilə birbaşa əlaqəli olan bu bank, dövlət maaş ödənişləri və müdafiə sektoru üzrə əsas maliyyə əməliyyatlarını həyata keçirən qurumdur.

"Ansar Bank" və "Kosar Bank" kimi ordu ilə bağlı digər maliyyə qurumlarında da gün ərzində kart əməliyyatlarında fasilələr baş verib. Müştərilər kartla alış-veriş və ya nağdlaşdırma edə bilmədiklərini bildiriblər.

Hazırda bu üç bankdan və ya İran rəsmilərindən mövzu ilə bağlı rəsmi açıqlama verilməyib.

Roza