Kim Çen In Rusiyanın işğalçı müharibəsində ölən əsgərlərlə belə vidalaşıb - FOTO

Şimali Koreya lideri Kim Çen In Rusiyanın Ukraynaya qarşı işğalçı müharibəsində həlak olan Şimali Koreya əsgərləri ilə vidalaşıb.

Publika.az xəbər verir ki, bu barədə “The Guardian” yazıb.

Kim əllərini onların tabutlarının üzərinə qoyaraq yad edib. Bu, onun hərbçilərinin münaqişədə itki verdiyinin nadir ictimai etirafıdır.

Bazar günü Şimali Koreya ilə Rusiya arasında hərbi paktın birinci ildönümünə həsr olunmuş bayram törəni zamanı ekranda Şimali Koreya liderinin ölkə bayrağı ilə örtülmüş onlarla tabut cərgəsinin qarşısında dayanan fotoşəkilləri nümayiş etdirilib.

Şərqi Pxenyan Böyük Teatrında keçirilən tədbirdə Şimali Koreyalı və dəvət olunmuş rusiyalı sənətçilərin çıxışları keçən iyun ayında Pxenyanda Kim və Rusiya prezidenti Vladimir Putin arasında imzalanmış qarşılıqlı müdafiə paktını qeyd edən şəkillərlə birləşdirilib.

Görüntülərdən birində Rusiyanın Kursk bölgəsində döyüş meydanında tapılan Şimali Koreya əsgərinə aid olduğu güman edilən qanlı dəftərin səhifələri görünüb.

Cənubi Koreyanın “Yonhap” Xəbər Agentliyinin məlumatına görə, qeyd dəftərindəki mesajlarda “Nəhayət həlledici məqam gəlib çatdı” və “Sevimli Ali Baş Komandanımızın bizə bəxş etdiyi sonsuz sevgi və etimadla bu müqəddəs döyüşdə cəsarətlə mübarizə aparaq” sözləri yazılıb.

Repatriasiya mərasiminin nə vaxt keçirildiyi bəlli deyil. Kim və onun bacısı Kim Yo Yonq və xarici işlər naziri Çxve Son Hi də daxil olmaqla digər rəsmilər qış paltarı geyiniblər və bu, əsgərlərin qalıqlarının aylar əvvəl Şimali Koreyaya qaytarıldığını ehtimal edir.

Tural