12 şəhərdə 2300 ölüm: Çölə çıxan hər kəs tappıltı ilə yerə yıxılır - FOTOLAR

Şimali Afrikadan gələn isti hava kütləsi əraziyə istilik gətirdiyi üçün Avropada temperatur qeyri-adi səviyyəyə çatıb. Avropanın 12 böyük şəhərində havaların isti keçməsi xeyli insanın ölümünə səbəb olub.

Publika.az xəbər verir ki, “World Weather Attribution” qrupu tərəfindən dərc edilən araşdırmada qeyd olunub ki, iqlim böhranı Avropada istiliklə bağlı ölüm sayını üç dəfə artırıb.

Elm adamları, iqlim dəyişikliyi baş verməsəydi, iyunun sonu və iyulun əvvəllərində Avropaya təsir edən temperaturun 1-4 dərəcə sərin olacağını bildiriblər.

Araşdırma London, Paris, Madrid, Barselona və Roma da daxil olmaqla, Avropanın 12 böyük şəhərində ümumilikdə 2300 insanın istidən öldüyünü ortaya çıxarıb. Bunlardan təxminən 1500-ü və ya 65 faizi insan fəaliyyəti nəticəsində yaranan qlobal istiləşmə ilə əlaqələndirilib.

Keçən həftə Londonda havanın temperaturu 34°C-yə çatıb və bu, Böyük Britaniyanın Səhiyyə Təhlükəsizliyi Agentliyinin "kəhrəba rəngli temperatur" xəbərdarlığı etməsinə səbəb olub.

Tədqiqatda iştirak edən elm adamları istilik dalğalarının "səssiz, lakin dağıdıcı" olduğunu vurğulayaraq, hətta indiki 1,3°C-lik qlobal istiləşmənin də yaşlılar və həssas qruplar üçün ölümcül nəticələrə səbəb olduğunu bildiriblər.

Londonda 263, Madriddə 317, Parisdə isə 235 nəfər istidən ölüb. Bu ölümlərin əksəriyyəti yaşlı insanlar arasında olub.

Mütəxəssislər xəbərdarlıq ediblər ki, Avropada qocalmış əhali daha tez-tez baş verən isti dalğaları səbəbindən artan risk altındadır.

Bildirilib ki, iyunun 23-dən iyulun 2-dək Avropa üzərində əmələ gələn yüksək təzyiqli hava Şimali Afrikadan gələn isti hava kütləsi ilə birlikdə temperaturu qeyri-adi həddə çatdırıb.

Tədqiqatçılar bu cür təhlillərin yalnız 12 şəhərdə aparıldığını və bu məlumatların Avropada istidən ölənlərin həqiqi sayının yalnız kiçik bir hissəsini əks etdirdiyini vurğulayıblar. Bildirilib ki, həqiqi rəqəm on minlərlə ola bilər.

Adəm