70 il yaşadığı evdən çıxarılan 87 yaşlı qadın öldü: Etirazların simvoluna çevrilmişdi

İspaniyada 70 il yaşadığı evdən məhkəmə qərarı ilə çıxarılan 87 yaşlı Mari Karmen Abaskal xəstəxanada vəfat edib.

Publika.az xəbər verir ki, Abaskal sentyabrın 23-də Madriddəki mənzilindən çıxarılıb, daha sonra xəstəxanaya yerləşdirilib. Bildirilir ki, onun səhhəti son aylarda pisləşib, lakin evdən çıxarıldıqdan sonra vəziyyəti daha da ağırlaşıb və iki həftə xəstəxanada müalicə olunub.

Abaskalın vəkili səhhətindəki ciddi pisləşməni evdən çıxarılma prosesi ilə əlaqələndirib. Lakin qadının dəqiq ölüm səbəbi açıqlanmayıb.

Onun vəkili bildirib ki, qadının evinə qayıtması üçün 8 illik yeni icarə müqaviləsi imzalanıb. Lakin Abaskal müqavilə qüvvəyə minmədən xəstəxanada vəfat edib.

Qeyd edək ki, Abaskalın evdən çıxarılması İspaniyada mənzil hüquqları ilə bağlı etirazlara səbəb olub və o, mənzil böhranına qarşı mübarizənin simvollarından birinə çevrilib. Abaskal ölümündən əvvəl xəstəxanadan etirazçılara müraciət edərək mənzil hüquqları uğrunda mübarizədən əl çəkməməyə çağırıb.

Ləman