Trampın Nobel mükafatı arzusu: Hər şey Ərdoğandan asılıdır

ABŞ prezidenti Donald Tramp və türkiyəli həmkarı Rəcəb Tayyib Ərdoğan arasında son söhbətdə Qəzzadakı vəziyyət və atəşkəs perspektivləri əsas mövzu olub.

Publika.az xəbər verir ki, bu barədə “Hürriyet” qəzetinin analitik məqaləsində bildirilir.

Türkiyə mənbələrinin məlumatına görə, iki lider arasında dialoq konstruktiv atmosferdə keçib və müzakirədə Türkiyənin davamlı atəşkəsin əldə edilməsində mümkün roluna toxunulub.

Ankaradakı siyasi müşahidəçilər qeyd edirlər ki, Ərdoğan müsəlman dünyasında əhəmiyyətli nüfuzu ilə İsrail, Fələstin və Qərb ölkələri arasında əsas vasitəçi ola bilər. Bu, Trampın əsas məqsədinə çatmaq, özünü dünyada sülhün memarı kimi göstərmək planına qapı açır.

Türkiyə ərəb dövlətləri arasında konsensusa nail olsa və atəşkəs əldə edə bilsə, Ərdoğan Trampın beynəlxalq diplomatik uğur qazana biləcəyi fiqur ola bilər. Belə bir ssenari, türkiyəli analitiklərin fikrincə, Trampın sülhməramlı imicini gücləndirə və hətta onun Nobel Sülh Mükafatına namizəd olmasına zəmin yarada bilər.

Ərdoğan üçün bu cür əməkdaşlıq həm də siyasi məna daşıyır: Türkiyə özünü sülh təşəbbüslərinin mərkəzi və qlobal proseslərə təsir edə bilən müstəqil bir qüvvə kimi təqdim edəcək.

Beləliklə, Yaxın Şərq nizamlanması kontekstində iki lider arasında mümkün qarşılıqlı əlaqə onların hər ikisinə - beynəlxalq nüfuz sferasında Ərdoğana və “ilin sülhməramlısı” statusuna yüksəlməkdə Trampa dividentlər gətirə bilər.

Tural