Rusiya borc içində boğulur: Bank böhranı ilə bağlı XƏBƏRDARLIQ EDİLDİ

Rusiyada sistemli bank böhranı ehtimalı artır.

Publika.az xəbər verir ki, bu barədə “İzvestiya” məlumat yayıb.

Oktyabr ayına olan məlumata görə, analitiklər vəziyyətin kritik səviyyəyə qədər pisləşməsi riskini orta hesab edirlər, çünki üç aydan çox müddətə ödənilməyən və geri qaytarılacağına ümidi az olan borclar sürətlə artır.

İlk doqquz ayda belə borc 1,6 dəfə artaraq 2,3 trilyon rubla (51 milyard manat) çatıb. Bununla yanaşı, bank institutları güzəştli proqramlara tələbatın pik həddə çatdığı dövrdə verilmiş köhnə ipoteka kreditləri, eləcə də 2023-cü ilin ikinci yarısı və 2024-cü ilin əvvəlində təminatsız istehlak kreditlərinin aktiv verilməsinin nəticələri ilə bağlı risklərlə üzləşirlər.

İqtisadçı ekspert Fyodor Sidorov deyib ki, bazarda domino effekti yarana bilər. Real sektorda hasilatın və mənfəətin azalması korporativ kredit ödənişlərini məhdudlaşdıracaq ki, bu da bankların kapital adekvatlığını pisləşdirəcək, bu da digər əmanətçilərin vəsaitlərinin xaricə axmasına səbəb olacaq.

Maraqlıdır ki, Rusiya Mərkəzi Bankı sistemli bank böhranı təhlükəsini görmür, çünki banklar əhəmiyyətli ehtiyatlar toplayıblar və riskləri azaltmaq üçün potensial problemli kreditlərlə fəal işləyirlər.

Makroiqtisadi Təhlil və Qısamüddətli Proqnozlaşdırma Mərkəzinin (CMASF) hesabatında qeyd olunur ki, iqtisadi yavaşlama ilə əlaqədar şirkətlərin borclarını ödəmək imkanları azalır və bu, fərdlərə deyil, konkret olaraq şirkətlərə aiddir. Ona görə də kredit ödənişləri üçün əsas təhlükə hələ qarşıdadır.

Başqa bir problem ondan ibarətdir ki, vəziyyət pisləşərsə, banklar kredit şərtlərini sərtləşdirməli olacaqlar ki, bu da öz növbəsində iqtisadi artımın bərpasını məhdudlaşdıracaq, yəni mövcud kreditlərin qaytarılması daha da çətinləşəcək.

Adəm