Əsədin şok görüntüləri ortaya çıxdı: Yemək yoxdur, amma məscidlərə pul xərcləyirlər - VİDEO

Devrilmiş Suriya lideri Bəşər Əsəd və onun keçmiş müşaviri Luna Əl-Şiblin 2018-ci ildə çəkilmiş görüntüləri ciddi mübahisələrə səbəb olub.

Publika.az xəbər verir ki, bu barədə "Əl-Ərəbiyyə" telekanalı məlumat yayıb.

Şərqi Qutada çəkilmiş görüntülərdə Əsədin yerli əhaliyə, öz əsgərlərinə və hətta öz soyadına qarşı təhqiramiz ifadələri, eləcə də dağıdılmış binalara qarşı mövqeyi yer alır.

Əsədin Suriyada naməlum bir yerdə maşın sürdüyünü göstərən videoda, o, Luna əl-Şiblin "Qutadan çıxmaq üzrəyik, nə deyəcəyik?" sualına gülərək "Quta cəhənnəmə getsin" cavabını verir. Eyni görüntülərdə Əsədin iqtisadi cəhətdən çətinlik çəkən yerli əhali tərəfindən məscidlərin tikintisini tənqid etdiyi, onları "məsuliyyətsiz fironlara" bənzətdiyi eşidilir. Həmçinin o, ictimaiyyətə qarşı təhqiramiz ifadələr işlədib, Şərqi Quta xalqını "cəmiyyətin ən pisləri" adlandırıb və "onların yeməyi yoxdur, amma məscidlərə pul xərcləyirlər" deyib.

Dağıdılmış binalar və boş küçələrdə səyahət zamanı Şiblin Əsədə "Humanitar məsələlərdən danışmağa dözə bilmirsən, amma hərbi məsələlərə gəldikdə, dirilirsən" dediyi qeydə alınıb. Əsədin daha sonra Suriyadakı mənzərəyə baxaraq "Mən yalnız utanc deyil, həm də ikrah hissi keçirirəm" dediyi də eşidilir.

Sızdırılan görüntülərdə ən diqqətçəkən məqamlardan biri isə Əsədin öz soyadını (ərəb dilində "Aslan" mənasını verir) ələ salaraq "Bu heyvan adı dəyişdirilməlidir" deməsidir.

Sözügedən görüntülərin Prezident Sarayında "Tam məxfi" yazılmış zərfdə tapıldığı bildirilib.

Roza