ABŞ-dan şok plan: İranın uran ehtiyatları ələ keçiriləcək? - Mümkün əməliyyatın bəzi detalları üzə çıxdı

ABŞ hərbçiləri ölkə Prezidenti Donald Trampa onun sorğusu əsasında hazırlanmış İranın zənginləşdirilmiş uran ehtiyatlarının ələ keçirilməsi planını təqdim ediblər.

Publika.az xəbər verir ki, bu barədə "The Washington Post" nəşri məlumat yayıb.

Mənbələrin sözlərinə görə, plan İranda təxminən 1 000 funt (təxminən 454 kq) yüksək səviyyədə zənginləşdirilmiş uranın ələ keçirilməsini nəzərdə tutur. Bunun üçün qazıntı işləri aparmaq məqsədilə texnikanın hava yolu ilə çatdırılması, həmçinin radioaktiv materialın çıxarılması üçün nəqliyyat təyyarələrinin enişi məqsədilə uçuş-enmə zolağının tikilməsi planlaşdırılır.

Nəşr qeyd edir ki, söhbət müharibə şəraitində indiyədək həyata keçirilməmiş son dərəcə mürəkkəb əməliyyatdan gedir. Planın həyata keçirilməsi üçün ehtimal ki, yüzlərlə, hətta minlərlə hərbçinin və ağır texnikanın hava yolu ilə bölgəyə göndərilməsi tələb oluna bilər. İlkin qiymətləndirmələrə görə, əməliyyatın icrası həftələrlə davam edə bilər və İran ərazisinin dərinliklərində, atəş altında həyata keçiriləcək. (Oxu.az)