Afina Ankaraya qarşı gizli silah planını işə salır: Bu addımı atacaqlar

Yunanıstanın müdafiə naziri Nikos Dendias silah ticarətində Türkiyə əleyhinə yeni doktrina tətbiq etməyi planlaşdırır.

Publika.az xəbər verir ki, "in.gr" saytının məlumatına görə, məqsəd Yunanıstanın aldığı əsas silah sistemlərinin Türkiyəyə satışının qarşısını almaqdır.

Bildirilir ki, Dendias xüsusilə Hərbi Dəniz Qüvvələri üçün yeni sualtı qayıqların alınmasına dair imzalanacaq mümkün müqavilələrə əlavə maddə daxil etməyi planlaşdırır. Məqsəd Yunanıstanın gələcəkdə satın alacağı hərbi sistemlərin Türkiyəyə satılmasının qarşısını almaqdır.

Dendiasın bu addımının Almaniyanın həm Yunanıstana, həm də Türkiyəyə "Tip 214" sualtı qayıqları satmasını istəməməsindən qaynaqlandığı vurğulanıb.

İddiaya görə, Dendias xarici işlər naziri olduğu dövrdə almanlarla görüşlərində bu məsələni dəfələrlə qaldırıb və onları "Ankaraya təslim olmamağa" inandırmağa çalışıb. 2020-ci ilin oktyabr ayında o, Almaniya, İspaniya və İtaliyanın o vaxtkı xarici işlər nazirlərinə Türkiyəyə qarşı silah embarqosu tələb edən məktublar göndərib.

Roza