Kosmosdan görünməmiş təxliyəyə səbəb olan astronavtdan etiraf: Yerə niyə qayıdıblar?

Amerikalı astronavt Mayk Finke ötən ay "tibbi hadisə" nəticəsində Beynəlxalq Kosmik Stansiyanı erkən tərk etməyə məcbur olan heyətin üzvü olduğunu təsdiqləyib.

Publika.az xəbər verir ki, Finke və ekipaj üzvləri - NASA astronavtı Zena Kardman, Yaponiya Aerokosmik Tədqiqatlar Agentliyindən Kimiya Yui və Rusiya kosmik agentliyi “Roskosmos”un kosmonavtı Oleq Platonov yanvarın ortalarında Beynəlxalq Kosmik Stansiyadan yerə qayıdıblar və göyərtədə üç kosmonavtdan ibarət kiçik bir heyət qalıb.

Qrupun qəfil təxliyəsi tarixdə ilk dəfə olaraq NASA-nın sağlamlıq səbəblərinə görə Beynəlxalq Kosmik Stansiyada işçi qüvvəsini azaltmaq məcburiyyətində qalması ilə əlamətdar olub. Amma Amerika kosmik agentliyi hansı astronavtların sağlamlıq problemləri olduğunu və ya problemin mahiyyətini açıqlamamışdı.

Finke adını ictimaiyyətə özü açıqlayıb, ancaq sağlamlıq vəziyyəti ilə bağlı ətraflı məlumat verməyib.

O, çərşənbə günü verdiyi açıqlamada bildirib ki, inanılmaz heyət yoldaşlarımın dərhal müdaxiləsini tələb edən tibbi hadisə ilə qarşılaşdım:

“Onların sürətli reaksiyası və NASA uçuş cərrahlarının rəhbərliyi sayəsində vəziyyətim tez bir zamanda sabitləşdi".

Mayk Finke bildirib ki, NASA heyətin kosmik stansiyada mövcud olmayan qabaqcıl tibbi görüntüləmə imkanlarından yararlanmaq üçün Yerə qayıtmasına qərar verib.

CNN qeyd edir ki, Beynəlxalq Kosmik Stansiya (BKS) tibbi avadanlıqlarla təchiz olunub, baxmayaraq ki, orada adi təcili yardım şöbələrində tapılan hər dərman yoxdur.

Ekipajın evə uçuşu zamanı NASA xəstə astronavtın vəziyyətinin sabit olduğunu bildirib. Lakin tibbi müdaxilənin həyati təhlükə yaradıb-yaratmadığı və Finke ilə birlikdə çalışan astronavtların problemi necə həll etdikləri hələ də məlum deyil.

NASA-nın uzun müddətdir ki, gizlilik səbəbi ilə astronavtları haqqında şəxsi tibbi məlumatları gizlətmək siyasəti mövcuddur. Kosmik uçuşların insan bədəninə təsiri və ya kosmik uçuş zamanı yaranan digər tibbi problemlər haqqında məlumatlar adətən daha geniş elmi tədqiqatların bir hissəsi kimi dərc olunur.

Tural