Dünya

Fırıldaqçılar pensiyaçı qadının yarım milyon manatını belə ələ keçirdi

10 Mart 2026 17:35

Rusiyada pensiyaçı qadın fırıldaqçıların qurbanına çevrilərək 22 milyon rubldan (təxminən 474 min manat) çox pulunu itirib.

Publika.az “Mk.ru”ya istinadən xəbər verir ki, bu barədə Rusiya Daxili İşlər Nazirliyinin Amur vilayəti üzrə İdarəsinin mətbuat xidməti məlumat yayıb.

Bildirilib ki, əvvəlcə qadına özünü çatdırılma xidmətinin əməkdaşı kimi təqdim edən naməlum şəxs zəng edib və ondan SMS-lə gələn kodu tələb edib. Bundan sonra zərərçəkənə guya onun adına etibarnamə rəsmiləşdirildiyi barədə bildirişlər gəlib.

Daha sonra onunla özlərini təhlükəsizlik xidməti əməkdaşları kimi təqdim edən şəxslər əlaqə saxlayıb və pulları “təhlükəsiz hesablar”a köçürməyə razı salıblar.

Qadın bank tətbiqi vasitəsilə göstərilən rekvizitlərə 12 milyon rubldan çox pul köçürüb, əlavə 10 milyon rublu isə nağd şəkildə kuryerə verib.

Hadisənin üzə çıxması ilə cinayət işi açılıb və şübhəli şəxslər saxlanılıb.

Roza