Atlantik okeanının ortasındakı kabusdan danışdı: Biz də insanıq

Xəbər verdiyimiz kimi, Atlantik okeanında üzən “MV Hondius” sərnişin gəmisində hantavirus şübhəsi dünya gündəminə çevrilib.

Publika.az “Milliyet”ə istinadən xəbər verir ki, Argentinadan Antarktida istiqamətində səfərə çıxan gəmidə indiyədək 3 nəfər həyatını itirib.

Ümumdünya Səhiyyə Təşkilatının rəhbəri Tedros Adanom Qebreisus açıqlayıb ki, gəmidən 3 xəstə təxliyə olunub və sərnişinlərin vəziyyəti yaxından izlənilir.

Gəmidə olan sərnişinlər isə vəziyyətin psixoloji baxımdan ağır olduğunu deyirlər. Sərnişinlərdən Ceyk Rosmarin bildirib ki, əsas istəkləri təhlükəsiz şəkildə evlərinə qayıtmaqdır: “Biz sadəcə manşet xəbərləri üçün hekayə deyilik. Ailələri və həyatı olan insanlarıq. Çox böyük qeyri-müəyyənlik var və hazırda ən çətin olan da budur. Sadəcə istəyirik ki, vəziyyət aydınlaşsın və təhlükəsiz şəkildə evimizə qayıda bilək”.

BBC-yə danışan başqa bir sərnişin isə gəmidə ən azı daha 3-4 gün qalacaqlarını və özlərini buna hazırladıqlarını deyib.

İspaniya hökuməti gəminin Kanar adalarına qəbul ediləcəyini və sərnişinlərə xüsusi tibbi protokollar çərçivəsində yardım göstəriləcəyini açıqlayıb.

Müəllif: Roza