Çin Rusiyaya görə Qərblə döyüşəcək? - Moskva inanmır

Çin Ukrayna münaqişəsində Rusiyanı dəstəkləməklə Qərblə birbaşa qarşıdurmaya girməyəcək.

Publika.az xəbər verir ki, bu fikri Rusiya Elmlər Akademiyasının Dünya İqtisadiyyatı və Beynəlxalq Münasibətlər İnstitutunun (IMEMO) Asiya-Sakit Okean Tədqiqatları Mərkəzinin rəhbəri Aleksandr Lomanov “Lenta.ru”-ya verdiyi müsahibədə bildirib.

Ekspertin fikrincə, Pekin Ukrayna ətrafındakı münaqişənin həllində aparıcı deyil, dəstəkləyici rol oynayır. Lomanov qeyd edib ki, Çin hakimiyyəti NATO-nun genişlənməsinə qarşıdır, lakin Qərb ölkələri ilə münasibətləri gərginləşdirmək niyyətində deyil, ona görə də, Rusiya ilə bağlı kursunu dəyişdirməyuəcək.

Alim vurğulayıb ki, Çin artıq Qərb siyasətinə qarşı başqa yollarla - qlobal iqtisadi sabitliyi dəstəkləməklə və açıq bazarları qorumaqla çıxış edir. Ekspert həmçinin Moskva ilə Vaşinqton arasında mövcud razılaşmalara da diqqət çəkib. Onun sözlərinə görə, Rusiya və Amerika tərəfləri Ukrayna böhranının ilk növbədə Rusiya və ABŞ tərəfindən həll edilməli olduğu prinsipi ilə fəaliyyət göstərirlər.

Mayın 13-də ABŞ Prezidenti Donald Tramp dövlət səfəri üçün Pekinə gedib və mayın 14-də Çin Prezidenti Si Cinpin ilə danışıqlar aparıb. Müzakirə ticarət məsələləri, Tayvan ətrafındakı vəziyyət, Yaxın Şərq münaqişəsi və iki ölkə arasındakı münasibətlərə yönəlib.

Eyni zamanda, Rusiya prezidenti Vladimir Putinin Çinə səfər edəcəyi barədə xəbərlər yayıldı. Putinin mətbuat katibi Dmitri Peskov səfərin Tramp və Si Cinpin arasındakı danışıqlarla əlaqədar olmadığını bildirib.

Müəllif: Tural