Süni intellektlə bağlı şok açıqlama: İnsanları öldürə bilər

Süni intellektin 10 il ərzində bütün insanları öldürə bilməsi ehtimalının 10 faizdən çox olduğu iddia edilir.

Publika.az xəbər verir ki, ABŞ mərkəzli “Anthropic” şirkətində süni intellektin insan dəyərləri ilə uyğunluğu üzərində çalışan tədqiqatçı Evan Hubinqer bu ehtimalın kifayət qədər ciddi olduğunu bildirib.

“Biz həqiqətən və səmimi şəkildə süni intellektin bütün insanları öldürə biləcəyinə inanırıq”, - o deyib. Hubinqerin sözlərinə görə, “Anthropic” süni intellekt risklərinin qarşısını almaq üçün əlindən gələni etsə də, super intellektlə bağlı uyğunlaşma problemini həll edəcək konkret plan hələ mövcud deyil.

“OpenAI” və “Anthropic”də tədqiqatçı kimi çalışmış Cekob Kokson isə hər iki şirkətin süni intellekt sahəsində kifayət qədər məsuliyyətli davranmadığını bildirib.

O, şirkətlərin özünü inkişaf etdirə bilən super intellekt yaratmaq üçün nəzarətsiz yarış apardığını vurğulayıb. Koksonun sözlərinə görə, gələcəkdə bu sistemlər istənilən sahəni bir gecədə dəyişdirə, real güc və resurslar əldə edə biləcək fövqəlinsan sistemlərə çevrilə bilər.

Tədqiqatçı həmçinin iddia edib ki, süni intellekt sahəsində çalışanların bir qismi bu texnologiyanın yaxın 10 il ərzində insanlıq üçün ölümcül təhlükəyə çevrilə biləcəyinə ciddi şəkildə inanır. Onun sözlərinə görə, şirkət rəhbərləri ictimaiyyət qarşısında daha mülayim danışsalar da, qapalı qapılar arxasında böyük narahatlıq hökm sürür.

Müəllif: Roza