34 günlük yağış rekordu: 140 il sonra ilk...

Tokioda meteoroloji müşahidələr tarixində ardıcıl yağıntılı günlərin sayına görə rekord qeydə alınıb.

Publika.az xəbər verir ki, Yaponiyanın Milli Meteorologiya İdarəsinin məlumatına görə, paytaxtda avqustun 27-dən etibarən, yəni 34 gündür yağış yağır. Bu, 1886-cı ildən (müvafiq statistikanın aparılmağa başlandığı vaxtdan - red.) bəri ən uzunmüddətli yağıntı dövrüdür.

Meteoroloqlar əlverişsiz hava şəraitini Yaponiyanın yaxınlığından keçən silsilə tayfunlarla əlaqələndirirlər.

Avqustun sonunda İşikava, Toyama və Niiqata prefekturalarının bəzi rayonlarında güclü yağışlar qeydə alınıb. Ayrı-ayrı ərazilərdə 24 saat ərzində yağıntının miqdarı 300 millimetri keçib. Sinoptiklər həmin vaxt sel və torpaq sürüşməsi təhlükəsi barədə xəbərdarlıq ediblər.

Həmin dövrdə 80 mindən çox insan üçün təcili xilasetmə tədbirlərinin görülməsini tələb edən ən yüksək – beşinci təhlükə səviyyəsi tətbiq olunub. Nəticədə Toyama və İşikava prefekturalarında leysan yağışları səbəbindən 100 mindən çox insana təhlükəsiz ərazilərə təxliyə olunmaq tövsiyə edilib.

Ləman