Türkiyə və Pakistan hərbçiləri Səudiyyə Ərəbistanına yerləşdirilir

Türkiyə və Pakistan hərbçiləri Səudiyyə Ərəbistanına yerləşdiriləcək.

Publika.az “TRT Haber”ə istinadən xəbər verir ki, bu barədə Məkkə Birgə Müdafiə Sazişi çərçivəsində Ər-Riyadda keçirilən Strateji Siyasi və Müdafiə Komitəsinin iclasından sonra qəbul edilən birgə bəyanatda bildirilib.

Komitə kollektiv müdafiə öhdəliklərinin praktiki icrasına dərhal başlanılmasına və razılaşdırılmış hərbi qüvvə və imkanların Səudiyyə Ərəbistanına sürətlə yerləşdirilməsi üçün zəruri tədbirlərin görülməsinə qərar verib. Bu addımın hərbi hazırlığı, inteqrasiyanı və təhdidlərə qarşı kollektiv imkanları gücləndirməsi nəzərdə tutulur.

Bəyanatda Məkkə və Mədinənin hədəfə alınması cəhdləri, eləcə də Səudiyyə Ərəbistanının şəhərlərinə, mülki və iqtisadi obyektlərinə hücumlar kəskin şəkildə pislənib. Tərəflər Krallığın təhlükəsizliyinə və ərazi bütövlüyünə qarşı hər hansı hücum və təhdidi rədd etdiklərini bildiriblər.

Qeyd edək ki, pakistanlı general-leytenant Nauman Mahmud Məkkə Müdafiə İttifaqının üç il müddətinə ilk baş katibi təyin edilib.