Folklend adalarındakı pinqvinlərdə virus aşkarlandı

Antarktika Tədqiqatları Elmi Komitəsi (SCAR) Antarktida yaxınlığındakı Folklend (Malvinas) adalarında yaşayan “Gentoo” tipli pinqvinlərdə ilk dəfə olaraq quş qripinin (H5N1) aşkar edildiyini açıqlayıb.

Publika.az xəbər verir ki, yanvarın 19-da Folklend adalarında 35 pinqvin ölü tapıldıqdan sonra tədqiqatçılar ölüm səbəbi ilə bağlı araşdırmalara başlayıblar. Araşdırmalar zamanı SCAR-ın baytar həkimi Ralph Vanstreels ölən pinqvinlərdən ikisindən alınan nümunələrin H5N1 pozitiv olduğunu və H5N1 virusunun ilk dəfə Folklend adalarında yaşayan "gentoo" pinqvinlərində görüldüyünü diqqətə çatdırıb.

Quş qripi virusu səbəbiylə daha çox pinqvinlərin öldüyünü qeyd edən Folklend adaları səlahiyyətlilərindən Salli Heatman 30 Yanvar tarixinə 200-dən çox ölü və ya ölməkdə olan pinqvin balalarının olduğunu bildirib.

Tədqiqatçılar Folklend adalarından Antarktidaya səyahət edən pinqvinlərin virusu Antarktidanın nəhəng pinqvin koloniyaları arasında yaya biləcəyindən narahatdırlar.

Aysel Şahmar