DİM ali məktəblərə qəbulun statistikasını açıqladı

Dövlət İmtahan Mərkəzi (DİM) 2026/2027-ci tədris ili üçün ali təhsil müəssisələrinə yerləşdirilmənin nəticələrinə dair geniş statistik məlumatları yayımlayıb.

Publika.az xəbər verir ki, bu il müsabiqədə iştirak edən 87 146 nəfərdən 58 947-si (o cümlədən 4 215 subbakalavr) tələbə adını qazanıb. Ali məktəblərin qəbul planı ilk mərhələdə 97.07% dolub.

Ötən illə müqayisədə tələbə adını qazananların sayı 1711 nəfər, dövlət sifarişi və dövlət hesabı ilə qəbul olanların sayı isə 290 nəfər artıb. Ümumilikdə 28 108 nəfər ödənişsiz, 30 522 nəfər isə ödənişli əsaslarla təhsil almaq hüququ əldə edib. 12 mülki ali təhsil müəssisəsində isə plan yerləri 100% dolub.

Ali təhsil müəssisələrinə qəbul olunan şəxslər avqustun 28-dən sentyabrın 8-dək (saat 18:00) elektron qaydada "my.gov.az" portalı vasitəsilə qeydiyyatdan keçməlidirlər. Müəyyən olunmuş müddətdə qeydiyyatdan keçməmək abituriyentin qəbuldan imtina etməsi kimi qiymətləndiriləcək.

I mərhələnin nəticələrinə əsasən, boş qalan plan yerlərinin müsabiqəsinə ümumi balı 200-dən, ikinci mərhələ balı 100-dən az olmayan abituriyentlər buraxılır.