Qarabağ Universitetində yeni təyinat - Foto

Qarabağ Universitetinin rektoru Şahin Bayramovun müvafiq əmri ilə Əli Məmmədov Biznes və İqtisadiyyat fakültəsinin dekan müavini vəzifəsinə təyin olunub.

Publika.az xəbər verir ki, bu barədə Təhsil Nazirliyi məlumat yayıb.

Qeyd edək ki, Əli Məmmədov Böyük Britaniyanın Ekseter Universitetində biznes və menecment ixtisası üzrə doktorluq, Liverpul Universitetində isə MBA dərəcəsi alıb.

O, 2005-ci ildə Bakı Dövlət Universitetinin Regionşünaslıq fakültəsinə qəbul olunub və 2009-cu ildə həmin fakültəni müvəffəqiyyətlə bitirib.

Əli Məmmədovun elmi-tədqiqat fəaliyyəti eko-innovasiya, rəqəmsal transformasiya, təchizat zəncirinin idarə edilməsi və maliyyələşdirilməsi, risklərin idarə olunması, eləcə də müəssisələrin fəaliyyət göstəricilərinin təhlili istiqamətlərini əhatə edir. Onun elmi məqalələri Business Strategy and the Environment, Technological Forecasting and Social Change və IEEE Transactions on Engineering Management kimi nüfuzlu beynəlxalq elmi jurnallarda dərc olunub.

Ekseter Universitetində iqtisadiyyat, biznesin idarə edilməsi və menecment fənlərini tədris edən Əli Məmmədov müxtəlif elmi-tədqiqat layihələrində də iştirak edib. O, ali təhsil proqramlarının hazırlanması, kurikulumların beynəlxalq standartlara uyğunlaşdırılması, məlumatların təhlili və akademik keyfiyyətin təmin edilməsi sahələrində geniş təcrübəyə malikdir.

Onun peşəkar fəaliyyəti elmi tədqiqat, ali təhsildə tədris, akademik idarəetmə və biznesin idarə olunması istiqamətlərini birləşdirir.