Saç tökülməsinə səbəb bu imiş

Alopesiya adətən başda baş verən patoloji saç tökülməsidir. Bu problemin bir çox səbəbi var, çox vaxt yalnız geniş araşdırma bunu anlamağa kömək edə bilir. Bununla belə, iki əsas amil var - endokrinoloji patologiyalar və yoluxucu xəstəliklər.

Publika.az xəbər verir ki, bu barədə dermatoveneroloq, kosmetoloq Zarina Sabayeva Lenta.ru-ya müsahibəsində danışıb.

Həkimin sözlərinə görə, alopesiya bədəndə müəyyən vitamin və mineralların çatışmazlığı, həmçinin psixoloji və psixiatrik pozğunluqlar nəticəsində meydana gələ, o cümlədən xəstənin müstəqil olaraq saçını dartdığı və ya dərisini cızdığı obsesif-kompulsiv vəziyyətlərlə də əlaqənləndirilə bilər. Səbəblər arasında Sabayeva irsi patologiyaları, stress faktorlarını, bədənin zəhərlənməsini və otoimmün xəstəlikləri də qeyd edib.

"Bəzən "köklərdə ağrı" hissləri və orta dərəcədə qaşınma ola bilər. Amma bu problem xəstəni və onun yaxınlarını psixoloji və estetik cəhətdən daha çox narahat edir. Ona görə də bu vəziyyətin müalicəsi prosesinə müxtəlif mütəxəssislər, adətən psixoterapevtlər də cəlb edilir", - ekspert bildirib.

Zarina Sabayeva vurğulayıb ki, əgər siz özünüzdə və ya uşağınızda həddindən artıq saç tökülməsindən şübhələnirsinizsə, dərhal həkimə müraciət etməlisiniz.

Aytən Məftun